Йошкар-Олаште «Ӱярня арня» фестиваль лиеш. Йошкар-Ола администраций пайремын программыжым савыктен. Тиде шошо пайрем «Школышто тунемше-влаклан калык тӱвыра» Россий кӱкшытан проект кышкарыште лиеш. Олаште мероприятий-влак 6,7,8,13 да 14-ше мартыште лийыт. Пайремлыме тӱҥ площадкыже рӱдӧ каныме парк лиеш, кажне мероприятий 12 шагатлан тӱҥалеш. Тушто ойыртемалтше фольклор программе лийшаш. Мутлан, маска вынемым кычалмаш, маска дене кучедалмаш.

Советский районысо рӱдӧ тӱвыра пӧртлан 55 ий. Шке жапыштыже 1965 ийыште тиде тӱвыра пӧртым Октябрьский революцийын кугу лӱмгчежыже вашеш  почыныт. Тудым почмашке тунам КПСС обкомын вуйлатышышт толыныт ыле. Тачысе кечын республикыште тиде тӱвыра пӧрт ойыртемалтеш, пандемий дечын ончыч ятыр концерт да мероприятий-влак эртаралтыныт. Черлан кӧра, тӱвыра полытын лумгечыжымат 3 тылзылан шӱкалыныт. Тудо кодшо кечылаште эртен. Тачысе кечын Советский тӱвыра пӧрт  пелен ятыр коллектив пашам ышта. Тиде «Кугезе кумыл» фольклор ансамбль, «Рампа» калык театр, ветеран-влакын хорышт, йоча-влак дене пашам ыштыше кружок-влак. 

Сергей Чавайн лӱмеш книгагудышто шуэн вашлиялтше книга-влакын пӧлкаже тоштерым ушештара. Тушто икмыняр курым ончыч лекше книга, кидвозыш-влак аралалтыт. Книга-влак тошто улыт, садланак нуным лудшо-влаклан огыл пу. Но нунын дене палыме лияш йӧн уло. Тидлан книга-влакым цифровалтат. Электрон йӧн дене книгагудын сайтыштыже палыме лийын кертыда. Историй шотан книга памятник-влакым «Культура» национальный проект дене келшышын цифроватлат. Михаил Ломоносов, Николай Карамзинын илымышт годым лукмо книга-влак. Чавайн лӱмеш книгагудышто шуэн вашлиялте книга ситышын. 2024 ий марте цифровой форматышке 60 утла книга памятникым кусарат. Эн ончыч 18 курымысо книга-влакым электрон йӧнышкӧ кусареныт. Марий йылме дене лекше тошто книга-влакым компьютер полшымо дене лудаш лиеш. Коллекцийыште йӱла, марий кундемын историйже дене кылдалтше савыктыш, этнографий материал. 

Ик эн тале боксер-влак рингышке лектыныт. Йошкар-Олаште бокс дене республикын чемпионат да первенство мучашлалтын. Тушко 70 утла спортсмен ушнен. Самырык спортсмен-влак шке профессионал моштымашыштым, физический ямде улмыштым ончыктеныт. Республикысе таҥасымаште Юл кундемысе федерал округысо первенствылан сборныйым ойыреныт. Тиде таҥасымашат  мемнан республикыште эрта. Марий Эл гычат спортсмен-влак тушто шке вийыштым ончыктат. 

Сонарзе-влакын писылыкыштым тергат. 6 мартыште Медведево районысо Песчаный поселкышто сонар биатлон дене регион кокласе турнир лиеш. Тушко районлаште сеҥышыш лекше 30 наре команде чумырга, чылаже 100 утла сонарзе таҥасаш тӱҥалеш. Марий Элыш Киров, Угарман кундемла гыч сонарзе-влак толыт. Тений икымше гана сонар биатлоныш ӱдырамаш команде-влак ушнат. 

Йошкар-Ола сылне верже дене ойыртемалтеш. Мемнан кундемышке толын кайымаш йот элышке миен коштмымат алмаштен кертеш. Марий Элын рӱдӧ олаже йот эллашке кайыме олмеш ойырымо 10 ола-влак радамышке пурен. Йодыштмашым онлайн-сервис полшымо дене эртареныт. Специалист-влак палемдат: Йошкар-Олаште тӱрлыжымат ужаш лиеш: Спасский башьнын, Москвасе Кремльын, тыгак Василий Блаженный храмын копийже-влакым. Эше икмыняр объект дене Йошкар-Ола Европа гай коеш. Пошкудо регионысо Озаҥ олат  тиде рейтингышке пурен. Тудым кугу рудӧола-влакын миксшылан шотлат. Озаҥыште Стамбул, Вена, Прага, Парижын сыныштым ужаш лиеш. Рейтингышке тыгак Петербург, Калиниград, Кисловодск, Выборг, Рыбинск, Красный Поляна, Петропавловск - Камчатский улыт. 

Марий Элыште тиде черлан кӧра ик еҥ ӱмыр лугыч лийын, пытартыш суткаште 25 еҥлан тиде диагнозым шынденыт. Тазалыкаралтыш министерстве увертара: ковид-стационарлашке 36 еҥ логалын. Тачысе кечын стационарыште 393 пациент эмлалтеш, 178 еҥын коронавирус пеҥгыдемдалтын, 18 еҥ ИВЛ аппарат полшымо дене шӱла. Пандемий жапыште регионышто чылаже 11 тӱжемат 845 еҥлан коронавирус диагнозым шынденыт, 172 еҥ тиде черлан кӧра ӱмыр лугыч лийын. 

ГИБДД пашаеҥ-влак автомашинам виктарыше ӱдырамаш-влаклан пеледышым пӧлеклат. Республикыште «Автоледилан пеледыш» акций эрта. Йошкар-Олан уремлаштышже ДПС экипаж ӱдырамаш-влакым саламла. Полиций пашаеҥ-влак корно правил эскерымым шотышко налыт, эн чечен-влаклан нуным умылтарат, ӱдырамаш кече дене саламлат. Ведомствышто увертарат: тиде акций республикыште йӱлашке пурен, тудо 8 март марте – ик арня шуйна. 

Каныш кечылаште Марий Эл коммерческий огыл организаций-влакын тӱнямбалсе кечыжым палемдымашке ушнен. Мемнан регионышто 700 наре тыгай организаций уло- тиде ветеран-влакын ушемыт, мер ушем да тӱрлӧ объединений-влак. Ушештарена, ушем але организаций парышым ыштен налаш огыл ышталтын гын, тудо коммерческий огыл организацийлан шотлалтеш. Пытартыш ийлаште НКО-влак социал йодышым рашемдымаште тыршат: илалше, инвалид-влаклан полшат, янлыкым аралымашке ушнат, экологий верч тургыжланат.

Федерал кугорно-влакым вӱд ташлыме жаплан ямдылат. Тидын нерген «Волго-Вятскуправтодор» увертара. Корным чоҥышо да шотышто кучышо-влак Марий Элыште федерал кугорнылаште шошо пагытыште чылажат икшырымын лийже манын тыршат. Лишыл жапыште подрядчик-влак корно воктене улшо пуч-влакым лум дечын эрыкташ тӱҥалыт, а 23 март гыч корным да корно сооружений-влакым утларак тӱткын эскераш тӱҥалыт. Корно службо-влак ошмам, тыгыде кӱйым, керамзит, пиламатериалым ямдыленыт. Пашам шукташ бригаде-влакым чумыреныт, 20 единице техникым лӱмын ойырымо. Корнылаште кӱварым, эҥерлашке йоген кайыме вӱд верым эрыктат.