Шернур районышто  «Йыван Кырла лудмаш» шанче-практик конференцийлан ямдылалтыт. Тудо Марий Элын да Шернур районын 100 ияш лӱмгечыштлан пӧлеклалтеш. Конференцийышке туныктышо, образований да культур сферын пашаеҥышт, аспирант да студент-влак ушнат. Нуно этнопедагогике, туризм, интернетыште йылмын вияҥмыже да моло йодыш-влакымат каҥашаш тӱҥалыт. Тӱвыра министертсвыште увертарат: форумышко ушнаш шонышо-влак йодмашым 10 март йотке пуэн шуктышаш улыт. Эпидемиологий ситуацийым шотышко налын, спикер-влак дистанционно йӧным кучылтын, докладыштым лудын кертыт. Конференцийым иктешлымеке,  сборникым савыктат. 

Финн-угор тӱнян тӱвыра рӱдывержым Эстонийыште, Абья-Палуойя олаште почмо. Пайрем   мероприятий Мульги волостьышто   лийын. Идалык мучко Абья-Палуойяште 27 тӱрлӧ мероприятий  эрташыш. Финн-угор тӱнян тӱвыра рӱдывержым почмашке Таллин олаште илыше марий-влакат ушненыт.  Кодшо ийын финн-угор тӱнян рӱдыверже лӱмым Пошкырт велысе Мишкан марий села нумале. Туддеч ончыч Морко велысе Унчо, тыгак Карелийысе, Венгрийысе, Удмуртийысе ял- влак лийыныт.

Советский районышто тений октябрь мучаш марте очистной сооруженийым чоҥен шуктат. Михайловка ялыште канализационный очистнойым ышташ тӱҥалыт. Тидын шотышто информаций Кугыжаныш закупко сайтыште савыкталтын. Объектым Садовый урем дечын 300 метр тораште ыштат. Тиде пашалан 32 миллион теҥге ойыралтеш.  Очистной сооружений ик суткаште 150 кубометр лавыран вӱдым эрыкташ тӱҥалеш. Тыге ялыште илыше-влакынат вӱдышт яндаррак лиеш.  Документаций дене келшышын, подрядчик пашам 29 октябрь марте ыштен шуктышаш. «Юл эҥерым тазаҥдымаш» нацпроект дене очистной сооруженийым Марий Турек район Ноля ялыште, тыгак Козьмодемьянскыште чоҥеныт. 

Чодырашке ече да пычал дене. Кундемыштына сонарзе биатлон дене республике кӱкшытан таҥасымаш лийшаш. Тудо 6 мартыште Медведево район Песчаный поселко воктене эрта. Команде-влак 1 март йотке пӱртӱс ресурс министерствышке йодмашым пуэн кертыт. Таҥасымашке сонарзе билетым налше-влак веле ушнен кертыт, кажне таҥасышын медицин справкыже лийшаш. 

Ялозанлык сатум ыштыше-влак тений январь тылзыште 3 миллард утларак теҥгелан продукцийым луктыныт. Тидыже кодшо ий тыгаяк жап дене таҥастарымаште 2,7% шукырак. Маристат увертара: 1 февральллан ончымаште республикыште 80 тӱжем утла вуй тӱкан шолдыра вольыкым ончат, тышечын утларакшым -70% тӱшка озанлыклаште кучат. Январь тылзыште фермер да предприятий-влак 30 тӱжем тонн шылым ыштен налыныт, шӧрым 13 тӱжем тонным лӱштеныт, муным 33 миллион штукам. Шӧр лӱштыш Медведево, У Торъял районлаште ик эн кугу.

Март тӱҥалтыште Марий Элыште "Самырык профессионал-влак" регионысо чемпионат лиеш. Тений тудо 9-ше гана талантан да уста тунемше ден студент-влакым пога. Ӱмашсе семынак почмо статус дене эрташ тӱҥалеш. 

Тунемше-влак физкультур дене олимпиадышке ушненыт. Икмыняр кече жапыште ӱдыр ден рвезе-влак теорий да практикыште шкеныштым тергеныт. Ты гана регионысо этапышке 9-11 класслаште тунемше 14 ӱдыр да 16 самырык рвезе ушнен. Нуно гимнастике, куштылго атлектике, теорий палымаште шкеныштым тергеныт. Кӱлеш баллым погышо-влак республикын чапшым финалысе этапыште Курский областьыште аралаш тӱҥалыт. Ушештарена, Марий Элыште школышто тунемше-влак коклаште Россий олимпиадын регионысо этапше эрта. Тений йоча-влак 22 предмет дене шинчымашыштым тергат. Регионысо этап 24, 25 февральыште испан йылме олимпиаде дене мучашлалтеш. Тиде арняште искусство, анличан йылме, технологий дене олимпиаде-влак лийыт. 

Сарзе-патриот тылзе жапыште республикысе школлаште патырлык урок-влак эртат. Йошкар-Оласе 27-ше номеран школышто тиде тылзым почыныт. Лишыл жапыште тушто тӱрлӧ акций, викторине, квест-влак лийыт. Тиде тунемме верыште ӱдыр ден рвезе-влак концерт программе дене пырля, «Шарнымаш сорта» да «Курымашлык полк» акцийлашке ушнат, тунемме верыште «Зарница» модмаш лиеда. Оборонно-массовый да сарзе-патриот тылзым почмашке «Воин чап клуб» ассоциацийын председательже Михаил Черепанов толын. Тудо йоча-влаклан йомшо салтак-влакым кычалме проектым илышышке пурташ темлен. 

Элым аралыше-влакын кечыже лӱмеш республикыште патриот шӱлышан мероприятий-влак лийыт. Регион вуйлатыше Александр Евстифеев тидын вашеш совещанийым эртарен. Чыла ола да районлаште пайремле да шарнымаш мероприятий-влак лийыт. Тиде пагытыште ветеран-влакланат тӱткышым ойырыман, самырык-влакымат патриот шӱлышеш куштымо нерген шарныман. Марий Эл вуйлатыше Республике Правительстве еҥ-влаклан мунициапал образованийлашке лекташ, пайрем мероприятийышке ушнаш да еҥ-влакым 23 февраль дене саламлаш темлен. Правительстве Председательын алмаштышыже Степан Воронцов палдарен: 23 февральыште Кугу сарыште лийше-влакын мемориалышт воктеке пеледышым пыштат, Йошкар-Оласе ракет дивизийын военнослужащий-влакым саламлаш тӱҥалыт. Регион вуйлатыше тиде кечын спортланат тӱткышым ойыраш темлен. Пайрем кечын самырык, тыгак сарзыеҥ-влаклан спорт сооружений-влак яра пашам ышташ тӱҥалыт, тидын дене пырля еҥ-влак республике да муниципал тоштерлашке яра миен толын кертыт. Совещанийыште 9 майлан ямдылалтме нерген ойленыт. Сеҥымаш парад вашеш  Йошкар-Оласе ракет дивизийын военнослужащийышт-влаклан вакцинацийым ыштат.