Шернур районышто кок у ФАП пациент-влакым вашлияш ямде. Зашижемье селаште да Ананур ялыште у фельдшер-акушер пункт-влакым ыштеныт. Тидын нерген тазалыкаралтыш министерстве палдара. ФАП-влакым ышташ 13 миллион теҥге ойыралтын. Кажныже 82 квадрат метр кумдыкан. Тушто персоналын, фельдшер-акушерын, процедурный кабинет-влак, санузел, тыгак шокшым пуышо пӧлем-влак улыт. Фельдшер-акушер пункт-влакым «Тазалыкаралтыш» нацпроект дене келшышын чоҥеныт. 

Йошкар-Олаште самырык еш-влаклан илымверым налаш але чоҥаш сертификатым пуэныт. «Илымвер» целевой программын «Самырык еш-влаклан илымверым ситарымаш» подпрограмме  2006 ий гыч илышышке пура. Тудын дене 400 утла самырык еш шке пачерышке але пӧртышкӧ илаш куснен. Субсидий дене ойырымо оксалан 22 тӱжем квадрат метр илымверым налме але чоҥымо. Чумыржо чыла еш-влаклан 265 миллион теҥгем ойыреныт. Кодшо кечылаште Йошкар-Ола администрацийыште самырык еш-влаклан сертификатым кучыктеныт. 

«Кажне ийын шукырак свидетельстве пуалтеш, тидыже куандара»,- каласен олан мэрже Евгений Маслов. Кодшо ийын 9 миллион теҥгелан сертификатым пуымо гын, кызыт 13 еш илыме вержым саемден кертеш. Идалык мучаш марте эше 6 самырык еш пачеран лийшаш.

Йошкар-Олаште 2022 ийыште тӱзатышаш кумдык-влак пале лийыныт. Общественный комиссий «Оласе йӧнан средам ыштымаш» проект дене олаште илыше-влакын темлымашыштым шотышко налын. Тиде 37 кумдык пурен, иктешлыше спискышке оласе 19 верым пуртеныт. Нунын гыч иктыжлан рӱдӧ олаште илыше 14 ий дечын кугурак кажне кумылан еҥ 26 апрель гыч 30 май марте Российысе платформышто йӱклен кертеш. Регистрацийым «Госуслуги» портал гоч але телефон номер полшымо дене эрташ лиеш. Рӱдӧ олаште илыше-влак Семеновко селаште Молодежный урем, тыгак Прохоров, Куйбышев, Вашский, Волков, Первомайский, Машиностроителей, Луначарский, Бауман, Яков Эшпай, Фестивальный да Йыван Кырля уремлаште йолешке-влакын коштмо верыштым тӱзатат. 

Самырык-влаклан энергетикым ужалыше-влак штрафым тӱлаш тӱҥалыт. Марий Эл Республикын Кугыжаныш Погынын 16-шо сессийыште депутат-влак у закон верч йӱкленыт. Тудын дене келшышын, ийготыш шудымо-влаклан 0,151 мг/куб.см  кофеин дене алкогольдымо энергетик йӱышым ужалаш чарыме. Тудым пудыртышо-влак административный штафым тӱлаш тӱҥалыт: граждан-влаклан 1 гыч 3 тӱжем теҥге марте, должностной лица-влаклан 10 гыч 30 тӱжем теҥге марте, юридический лица-влаклан 30 гыч 50 тӱжем тенге марте. Нормативный акт, тудым савыктыме дечын, 10 кече гыч илышышке пура.  

Тений Марий Элыште регионысо 186 километр корным нормативлан келыштарат. Тидын нерген Россий Госсоветын «Транспорт» виктыш дене заседанийыштыже пале лийын. Тудым Правительстве председательын алмаштышыже Марат Хуснуллин эртарен. Видеоконференцийышке регион вуйлатыше Александр Евстифеев ушнен. 2021 ийыште Марий Элыште «Корно сеть» регионысо проектлан 2 миллиардат 800 миллион теҥге ойыралтеш. Тиде оксам  кундемысе 186 километр корным тӧрлаш ойырат. План дене Йошкар-Олаште 12 километр корным шотышко кондышаш улыт. Тыгак Марий Элыште Киров урем тӱҥалтыште магистральым чоҥымо пашам шуят, тыгак Сомбатхей микрорайонышто Ураев да Петров урем-влакым ыштат. 

Правительствын тыршымашыжлан кӧра, республикыште пандемий жапыштат «чоҥымаш» отрасльыште паша ончыко каен. Регион вуйлатыше Александр Евстифеев Кугыжаныш Советын «Чоҥымаш, илымвер-коммунал озанлык, оласе среда» виктыш дене комиссийын заседанийышкыже ушнен. 2021 ийыште Марий Элыште 363 тӱжем квадрат метр илымверым чоҥышаш улыт. Республике Правительствын тыршымашыже дене, 2020 ийыште чоҥымаш отрасльыште лектыш 19% шукемын. Тыгодым илыме пӧрт-влакым 7% шагалрак чоҥеныт. Республикын социал-экономике могырым вияҥмаш шотышто индивидуальный программе дене паша кая. 2020 ийыште федерал да республикысе бюджет кӱшеш чоҥымашлан 1 миллиард тенге ойыралтын.  

Кумылан-влак «Ава да йоча-влак калык вургем дене» фотоконкурсыш ушнен кертыт. Кызыт тиде тӱнямбал конкурсыш йодмашым налаш тӱҥалыныт. Чылаже 150 финалистым да 20 сеҥышым увертарат. Фотоконкурсын лектышыже почеш Москосо ВДНХ-ште 16 октябрьыште «Ава да йоча-влак калыкле вургем дене» фотоончер ышталтеш. Конкурсым “Ӱдырамаш-влакын интернационал ушемышт» эртара.

Марий йылме дене регион-влак кокласе кӱкшытан олимпиаде тений заочно йӧн дене эрта. Тушто шке шинчымашыштым Татарстан, Башктортостан республикыла, Свердловский область гыч тунемше-влак тергаш тӱҥалыт. Ешарен кодаш лиеш, марий йылме дене республике кӱкшытан олимпиадышкыже кундемнан районлаж гыч ӱдыр-рвезе-влак толыныт, а теве ИКН дене олимпиаде тений заочно эртен. 

Изи Карина черетан фестивальыште ойыртемалтын. Иваново олаште «Уникальные люди» инклюзивный фестиваль   эртен. Пандемийлан кӧра тудо онлайн лийын. Тазалык дене эмганен вияҥше-влак тӱрлӧ шӧрыныштат шке усталыкыштым ончыктеныт. Изи Карина Ава нерген мурым йоҥгалтарен да вокал номинацийыште Гран-При да окса премий дене палемдалтын. Ешарен кодаш лиеш, Карина Звенигово район Кожласолаште ила. 13 ияш ӱдырым шошым Санкт-Петербург олашке вес конкурсышко ӱжыныт.