Шочмо йылме-влакын кечышт лӱмеш мемнан кундемыште кумда эстафете тӱҥалтышым налын. Республикыште 50 тӱрлӧ калык ила, кажныжын шке йылмыже, тӱвыра, йӱла ойыртемже. Видео-эстафетышке кажне кумылан еҥ ушнен кертеш. Тидлан почеламутым сылнын лудман. Участник-влак видеошто шке лӱмыштым да сылнымутын авторжым ойлышаш улыт. Видеоролик-влакым марий тӱвыра рӱдерышке колташ лиеш, вара нуным «ВКонтакте» социал вотышко вераҥдат. 

2021 ий Россий Президент Владимир Путинын кӱштымашыже дене шанче да технологий идалык. Тидыже элысе шанчылан веле огыл, кундемланат кӱлеш. Марий Элыште шанче пашам Валериан Васильев лӱмеш шанче-шымлыше институтышто вораҥдарат да ончыко колтат. Тушто шанче да технологий идалыкым пайремлын почыныт. Институтышто научный сессий эртен. Ученый-влак шанчым вияҥдымаште у технологийым кучылтмо нерген, марий йылмым вияҥдыме нерген ойленыт. Тидын дене пырля эртыше идалыкым иктешленыт да ончыкылык пашалан радамым чоҥеныт. 

Кова 2 миллионат 800 тӱжем теҥгелан ондалалтын. Регионысо элкӧргӧ паша министерстве увертара: тыште мошенник-влак титакан улыт. Полицийышке 61 ияш ӱдырамаш толын. Тудлан кастене палыдыме еҥ йынгыртен. Абонент Рӱдӧ банкын пашаеҥже улам, манын, да кован лумеш кредитым налаш шонышо-влак нерген пуйто шижтарен. Мошенник ӱдырамашлан счетышто оксам налаш да лӱдыкшыдымӧ вес счетышко пышташ темлен.Ӱдырамаш ӱшанен, банкыште оксам налын, мошенник-влак тудлан таксим ӱжыныт, транспорт тудым банкомат марте наҥгаен, тушто кова шке оксажым мошенник-влакын счетышкыжо колтен. Мӧҥгӧ толмеке веле, ондалалтмыжым умылен. Следователь-влак тидын шотышто уголовный пашам тарватеныт, полиций пашаеҥ-влак ондалыше-влакым кычалыт.  

Йошкар-Олан рӱдыштыжӧ кум камерым вераҥдат. Лишыл жапыште Первомайский уремыште рӱдо пазар воктене корно правил пудыртымым возышо стационарный кум фотовидеофиксаций комплекс лиеш. Тений регионышто корнылаште чылаже 54 стационарный да мобильный  куснылшо камерым шындат. Йошкар-Олаште ныл камерым Воскресенский да Царьградский проспект ушнымаште, тыгак Кремлевский уремыште вераҥдат. Первомайский уремыште рудӧ пазар тураште Пушкин гыч Ленинский проспект марте. Тушто улшо камере-влак транспортын чын шогалмыжым эскераш тӱҥалыт.

Республикысе аграрий-влак шошо пасу пашалан ямдылалтыт, оборудованийым олмыктат. Тыгак техникым ачалат але тудым йӧршын уэмдат. Тылеч посна теорий могырым шинчымашым пенгыдемдат. Ялозанлык министерство ден агробизнеслан  пашаче кадр-влакым ямдылыше институт дене туныктымо семинарым эртареныт. 

Индешымше классыште тунемше-влак иктешлыше собеседованийыште шинчымашыштым тергеныт. Тудым сдатлымеке веле, тунемше  кугыжаныш аттестацийым кучен кертеш. Собеседованийыште оценкым огыт шынде, «зачет» але «незачет» манын палемдат. «Незачет» оценкылан шинчымашым ончыктышо-влак , 10 мартыште да 17 майыште уэш собеседованийым эртат. Тунемше-влак 15 минут жапыште ныл заданийым шуктеныт: текстым йӱкын лудыныт, тудым каласкаленыт, ик теме почеш шонымашым почын пуэныт да туныктышо дене диалогышко ушненыт. 

Пытартыш суткаште эше ик еҥ коронавирус инфекцийлан кӧра ӱмыр лугыч лийын. Тыге пандемий тӱҥалме дечын вара 160 еҥ колен. Кажне кечын кокла шот дене 42-43 еҥ черлана, пытартыш жапыште стационарлаште эмлалтше-влакын чотышт шагалемеш.  Тачысе кечын стационарлште коронавирус але тудын лийын кертме лӱдыкшӧ дечын эмлалташ 885 вер уло, стационарлаште 588 еҥ эмлалтыт. Тыгодым тӱҥ санитар врач палемден: вирус огеш чакне, еҥ-влак санитар правилым шуктышаш улыт. Кызыт студент-влак тунеммаш деке пӧртылыныт, 65 ий дечын кугырак ийготан туныктышо-влак очно пашам ыштат. 

У коронавирус инфекцийым чактараш вакцинаций полшышаш. Республикыште тиде пашам вораҥдарен колтыман. Тидын нерген Марий Эл вуйлатыше Александр Евстифеев оперативный штабын черетан заседанийыштыже увертарен. Регионышто вакцине ситышын уло, садланак предприятийлаште тыршыше, студент да туныктышо-влаклан прививкым ыштыман. Тазалыкаралтыш министерствыште палемдат: тӱшка калыклан вакцинацийланат тӱткышым ойырыман, поснак кугырак ийготан-влаклан. Республикыште вакцинацийым ышташ 19 пункт уло, тидын дене пырля 8 мобильный пункт пашам ышта, тышечын 6-шо – Йошкар-Олаште, 2-шо – районлаште. Вакцинацийым ышташ пунктлаште вакциным кондыштараш кӱлеш оборудований уло, лишыл жапыште эше фармацевтический морозильный да холодильный оборудованийым, рефрижераторым  конден шуктат.  

Январь тылзыште 10 тӱжем утла еш социал полыш дене пайдаланен. «Йоча шочмо годым финанс полыш» регионысо проект дене келшышын,  тидлан 112 миллион теҥге ойыралтын. Социал аралтыш министерстве увертара: окса гыч пелыже федерал бюджет гыч. Марий Элыште финанс полышым 9 тӱжемат 927 еш налын. Ушештарена, регионысо проект 2024 ий марте келыштаралтын, тудлан оксам федерал да республикысе бюджет гыч ойырат. 

Шошо толмеке, республикыште корно-влакым тӧрлаш, чоҥаш тӱҥалыт. 2021 ийыште кундемыште тиде пашалан чыла гаяк контрактым пеҥгыдемдыме. Александр Евстифеев корным чоҥымо, тыгак элыште инфраструктурын вияҥмыже нерген регионысо вияҥмаш шотышто Правительстве комиссийын заседанийышкыже ушнен.   Тудым Россий правительстве председательын алмаштышыже Марат Хуснулилин эртарен. Марий Элыште корным план дечын ончычрак чоҥат. Тидын дене - регион ончылно. 2021 ийлан палемдыме паша гыч 98 процентше дене контрактым пеҥгыдемдыме. Тыгак 2022 - 23 ийланат контракт-влакым ышташ тӱҥалыныт. Вес ийлан 7 ойпидышым ыштеныт, тидын радамыште Киров да Строителей уремым ушышо магистраль.