Коронавирус инфекцийым шижтарыме шотышто посна ямде улмо режимым 14 март марте шуйымо. Тидын нерген регион вуйлатыше оперативный штабын черетан заседанийыштыже увертарен. Тыгодым улшо чарымаш-влакым мыняр-гынат лушкыдемденыт. Спорт, тӱшка мероприятий-влакым тыгак чарыме, а теве концерт зал, театрлаште, общепит объектлаште 50 процент гына огыл, а тичмаш зал лийын кертеш. Студент тӱшкагудылаште комендант шагатым чарыме. Маскым чийыме режим аралалтын кодеш, еҥ-влак эпидемиологический правил нерген шарнышаш, социальный дистанцийым эскерышаш улыт.

2020 ийын мурыжо – Игорь Антроповын йонгалтарыме «Канде муро». Марий Эл Радио йӱлаш пурышо «Идалыкысе муро» фестивальым молгунамсе семынак кугу кӱкшытышто эртарен. Лӱмгече пайрем концертым тений еҥ-влак вияш эфирыште онченыт. Тыге кугарнян кастене 2 тӱжем наре еҥ экран воктене йӧратыме мурызо да радиовӱдышӧ-влакым эскерен, сеҥыше-влак верч йӱклен. «Интернет», «Эфир» да «Он-лайн» номинацийлаште сеҥыше-влакым палемденыт. 

«МЭТР» телерадиокомпанийын пашаеҥышт «Калык верч тыршымаш» медаль дене палемдалтыныт. « Марий Эл Радион» «Идалыкысе муро» фестивальыштыже республикын тӱвыра, печать да калык-влакын пашашт шотышто министрын алмаштышыже Михаил Матвеев мемнан коллегына-влакым саламлен. «Марий Эл ТВ»-н корреспондентше Вера Горохова черетан суаптар дене палемдалтын. Вера телеканалыште 10 ий пашам ышта. Тудын сюжет, репортажше-влак калыкым увер дене палдарат. Тидын дене пырля Верам эстрадыштат ужына. Тудо  мыскара номерже-влак дене ятыр еҥым воштылтарен, илыш нерген шонкалаш тарата. Калык верч тыршымаш» медаль дене тыгак «Марий Эл Радион» тӱҥ редакторжо Володя Матвеев палемдалтын. Володям уста журналист, драматург, мурызо семын палена.  «Калык верч тыршымаш» медальым республикын тӱвыра, печать да калык-влакын пашашт шотышто министерство Республикын 100 ийже вашеш, марий Облисполкомын икымше председательже Иван Петровым шарныме лӱмеш луктын. Тудын дене республикыште, марий илышыште пашам вораҥдарыше  уста еҥ-влакым чапландарат.

Йошкар-Олаште Марий мер каҥаш «Марий калык финн-угор ешыште» йыргешке ӱстел йыр погынымашым эртарен.  Тушто финн-угор тӱня дене пашам ыштыше ушем, коммерческий огыл организаций-влак, Российысе финн-угор калык-влакын ассоциацийышт чумыргеныт. Погынымаште Марий калык погынын пашажымат иктешленыт, тудын кӱлешлыкше нерген мутланеныт. Тидын деч посна ятыр мероприятий тенийлан кусаралтын. Мутлан, финн-угор конгресс, тӱрлӧ конфренций-влак, финн-угор ассоциацийын форумжо да тулеч молат. Марий Элыште кызытак нине вашлиймашлан ямдылалташ тӱҥалыныт. Секций-влакын паша радамыштым каҥашеныт, модератор-влакым темленыт, мутланымашке лукташ йӧршӧ йодыш-влакым лончыленыт. «Марий калык финн-угор ешыште» вашлиймаш годым, у савыктышым аклаш луктыныт – тиде «Герои финно-угорских народов России». Ты книгашке финн-угор калыкла гыч лекше да Кугу ачамланде сарыште кучедалше салтак-влакын лӱмыштым  пуртеныт. Нунын историйышт дене шарнымаш, очерк, автобиографий гоч палдарат.

Тиде кечылаште Йошкар-Олаште  духовой семӱзгар пӧлкалаште тунемше-влак коклаште конкурс эрта. Йоча-влакын усталыкыштым оналайн-йӧн дене 10 гыч 15 февраль марте аклат. Конкурсышко Марий Эл гыч веле огыл, тыгак Чуваший, Татарстан республикыла да Кировский область гыч  200 утла самырык музыкант ушна. Ӱдыр ден рвезе-влакын усталыкыштым кум номинаций дене аклат: «Солист», «Ансамбль», «Оркестр-влак»

Марий Элыште «Без срока давности» выставке почылтын. Архив негызеш чумырымо ончерыште еҥ-влак нацистский Германийын Совет Союзышко керылтмыже шотышто документ дене палыме лияш йӧн уло. Южыжым икымше гана ончыктат. Юл кундемысе федерал округын чыла регионлаштыже тиде выставке 8 февральыште почылтын. Шке жапыштыже 75 ий ончыч СССР-н тӱҥ кугыжаныш обвинительже Нюрнбергыште тӱнямбал трибуналыште ойым ойлен. Выставкын экспозицийже 24 стендым уша.   Ешарен кодаш лиеш, ӱмаште тиде проект шарнымаш да чап идалык жапыште эртаралтше проект-влак коклаште «Победа» премийым сулен. 

Марий Элысе тунемме верлаште энергоэффективность пашам кугемдыме шотышто программым илышышке пуртат. Тудын дене келшышын школлаште энергийым аныклымаште тӱрлӧ йӧным кучылтыт. Тыгак вӱд, шокшо, электроэнергийлан окса аныклалтеш. Йошкар-Оласе 2-шо номеран школышто 2018 ийыште эксперимент почеш шокшым регулироватлыше аппаратым шынденыт.  Уремыште южын температурыжым шотышко налын, тиде прибор пӧлемыште кӱлеш  температурым кучаш полша. Кызыт школышто окна-влакым вашталтат, а 2022 ий марте тошто батарей олмеш алюминиевый радиатор-влакым шындышаш улыт. 

Марий Элыште коронавирус дене черланыше-влакын чотышт 11 тӱжем еҥым эртен. Пытартыш суткаште 43 еҥын тиде вирусым лабораторно пеҥгыдемденыт. Пандемий тӱҥалме дечын вара республикыште черланыше-влакын чотышт 11 тӱжемат 8 еҥышке шуын. Тачысе кечылан стационарлаште коронавирус але тудын лийын кертме лӱдыкшӧ дечын 604 пациент эмлалтеш, 111 еҥ нелын черле, пытартыш суткаште 28 еҥым эмлымверышке пыштеныт. Оперативный штабын уверже почеш: у коронавирус инфекцийлан кӧра республикыште 157 еҥ колен, 9 тӱжемат 700 еҥ эмлалтын. Российыште инфицированный–влакын чотышт 4 миллионышкат шуэш. 

Марий Элыште шуко шочшан еш-влаклан коҥга да электрооборудованийлан роскотым петыраш полшат. Пожар ваштареш кучедалше кугыжаныш службын республикысе виктемже увертара: шуко шочшан еш-влак ведомствышко яра полышлан йодмаш дене лектын кертыт. Ешын парышыже регионышто илен лекташ ситыше окса кугыт дечын шагалрак гын, шаланыше коҥгам, тӱньыкым, электрооборудованийым яра тӧрлат. Тыгак нунылан шикш лекме нерген шижтарыше прибор-влакым пуат. Тидын шотышто постановленийышке кидпалыжым регион вуйлатыше Александр Евстифеев 30 январьыште пыштен. 

«Российысе сокыр-влак ушемын» Марий Элысе пӧлкаже «Раскрасим жизнь незрячих детей ярками красками» да «Волшебная радуга» лӱман проек-влакым илышыш шыҥдара. Социал могырым кӱлешан кок проект сокыр але начарын ужшо йоча-влаклан виктаралтын.