Марий Элыште 180 наре волонтер доброволец-влакын республикысе школышкыжо возалтыныт. 2021 ийыште кум тылзе жапыште кумылан-влак онлайн йӧн дене тунемаш тӱҥалыт. Эн чолга еҥ-влаклан бонус шотеш школышко ушнымо нерген сертификатым пуат, тыгак нуно ончыкыжым кеҥежымсе школышко ушнен кертыт. Тудо лагерь формат дене эрта. Тидын дене пырля волонтер-влак шке опытышт дене палдарат, у еҥ-влак дене вашлийыт.
Республикыште школышто тунемше-влак коклаште Россий олимпиадын регионысо этапше эрта. Ты марте тунемше-влак 9 предмет дене уш-акылыштым тергеныт гын, тиде кечылаште биологий дене олимпиадым возеныт. Тудо кок кече шуйна, теорий да практике ужашым ушен. Интеллектуал таҥасымашке 40 тунемше ушнен. Олимпиаде 25 февраль марте шуйна. Тушко муниципал этапыште ойыртемалтше ӱдыр-рвезе-влак ушненыт. Тений эпидемиологий ситуацийлан кӧра, олимпиаде дечын ончыч температурым висат, кидым антисептик дене шыжыктат, социал дистанцийым эскерат, тыгак класс-влакын дезинфекцийыштым ыштат.
Республикыште 5 тӱжем утла еш икымше йочалан кажне тылзын ойырымо 5 тӱжем теҥге дене налын. Тиде пособийым «Демографий» нацпроект дене «Икшыван еш-влаклан финанс полыш» регионысо проект дене ойырат. Ешыште парыш илен лекташ ситыше кок кугыт дечын шуко огыл гын, йодмашым возаш лиеш. Икымше йоча шочмеке, кум ий марте тиде пособийлан йодмашым кеч-могай жапыште социал аралтыш рӱдерлашке возаш лиеш.
Кодшо ий декабрьыште Марий Элыште муно, пакчасаска, сӧрастарыме ӱзгар, шине шергештыныт, ужар чай ден шовын шулдештыныт.
Маристатын увертарымыж почеш, кочкыш сату тӱҥ шотышто муно ден пакчасаскалан акым кугемдымылан кӧра шергештын.
Пакчасаска кокла гыч кияр 50% процентлан шергештын, помидор – 30%. Эн чот сакырложаш шулдештын 4% процентлан, тыгак шинчал, ужар чайын акше волен.
Российысе перепись марте кок тылзе наре кодеш. Тудо 1 апрельыште тӱҥалеш. Икымше гана перепись цифровой технологий-влакым кучылтын эрта. Кажне переписчикын электрон переписной лаштык дене планшет лиеш. Маристатын вуйлатышыже Александр Целищев палемден: Марий Элышке переписчик-влаклан экипировко ситышын толын. А тиде - удостоверений, шарф, волгалтше жилет, портфель, фонарик да пийым лӱдыктышӧ устройство. Лишыл жапыште маске да перчатке-влакым конден шуктат. Республикыште калык чотым шотлаш 2 тӱжем наре еҥ кӱлеш, таче кечын утларакшым - 99% - ойыреныт. Пашам тӱҥалме дечын ончыч нуно чыланат тунеммашым эртат. Перепись вашеш пӧрт-влакын номер, урем лӱм возымым тергеныт, тыгак стационарный участке-влаклан верым ойыреныт. Тенийысе переписьын ойыртемжат уло. Еҥ-влак переписчик дене вашлияш огыт шоно гын, шке семын «Госуслуги» портал гоч калык чотым шотлымашке ушнен кертыт.
Йошкар-Олаште у перинатальный рӱдер шке икымше пациентше-влакым вес ийын вашлиеш. Регион вуйлатыше Александр Евстифеев чоҥалтше объектыште лийын да паша кузе кайымым аклен. Таче кечын чоҥышо-влак пырдыжым нӧлтен пытарат, тӱжвал могыр гыч электрический сетьым шупшыт, кокымшо да кумшо пачашым шокшемдат. Республикылан кӱлешан тиде объектым «Казанский посад» ушем чоҥа. Тудын вуйлатышыже Руслан Муталиев палемден: март тылзыште зданийышке шокшым пуат, садланак тушто кӧргӧ отделкым тӱҥалыт. Кодшо ий да тенийысе идалыклан пашалан ик миллиардат 600 миллион тенгем палемдыме, январь тӱҥалтышлан 700 миллион наре ойыралтын, оборудованийым налаш контракт-влакым пеҥгыдемдыме. Объектым тений декабрь марте чоҥен шуктышаш улыт.
Марий пайрем йӱла нерген кумданрак палдараш. «МЭТР» телеканал онаеҥ-влак дене пырля «Марий йӱла» программым тӱҥалеш. Передаче эфирышке кажне кугарнян лектеш. Республикысе онаеҥ-влак йӱла ойыртем, ушемын паша радамже, пайрем нерген каласкалаш тӱҥалыт. Программын унаже-влак коклаште республикын тӱрлӧ кундемлаж гыч онаеҥ-влак лийыт. Икте - Коҥга пайрем, весе - Ӱярня, кумшо - Семык да моло пайрем йӱла нерген ойлаш тӱҥалыт. Съемко турло вере лиеш. Икымше передаче шушаш кугарнян 29 январьыште эфирыш лектеш. «Республикысе рӱдо юмынйӱла ушем» вуйлатышын алмаштышыже, онаеҥ - Альберт Рукавишников ушемын пашаже, историйже нерген ойла. «Марий йӱла» передачым «МЭТР» телеканалыште ончыза.
27-ше январьыште Россий МИД-ын Йошкар-Оласе представительствыже книга презентацийым эртарен. 2020-шо ий тӱҥалтыш пандемий тӱҥалме дене шарналтеш. Коронавирус черын шарлымыжлан кӧра кугыжаныш чек-влак петыралтыныт, тӱнямбал да эл кӧргысӧ авиакыл кӱрылтын, пеҥгыде карантин пурталтын. 18-ше март гыч 21-ше сентябрь марте федерал кучем ден авиакомпаний-влак, Российысе дипломат представительствыла дене пырля Российыш 313 тӱжем еҥым 138 эл гыч конден кертыныт. Чыла тидын нерген «Своих не бросаем» савыктыш каласкала. Книгаште фотосӱрет, событийыште лийше еҥ-влакын каласкалымашышт улыт.
Марий Эллан спортобъект-влакым чоҥен шукташ 20 миллион теҥге ойыралтеш. Элыште 78 регионлан федерал бюджет гыч окса полышым ойырат. Тидын шотышто распоряженийышке кидпалыжым премьер-министр Михаил Мишустин пыштен. Субсидий-влакым «Развитие физической культуры и спорта» кугыжаныш программе дене ойырат. Тиде окса дене почмо типан 100 физкультур-спорт комплексым, спортплощадке да футбол дене модаш пасу-влакым ыштат. Чыла объект-влак ялыште да олаште илыше-влаклан йӧнан верыште лийшаш, тыгак тазалык дене эмганыше-влаклан келыштаралтшаш улыт. Икмыняр кече ончыч премьер-министр ушештарен: 2030 ий марте элыште спорт да физкультур дене кылым кучышо-влакын чотышт 70% наре шукемшаш.
Кодшо ийын республикыште ялозанлык пашаеҥ-влак 50 миллиард тенгелан сатум ыштеныт. Тиде ончылийсе дечын 3,9 % шукырак. Тӱҥ шотышто республикыште тӱкан шолдыра вольык чотшо шукемын. Пакчасаска лектышат куандарен, пырчым 31% шукырак поген налыныт. Пакчасаскам 6% шукырак куштеныт.
