Российысе переписьым шыжылан кусарыме. Россий Правительство вашталтышым пуртен. Апрель олмеш калык чотым сентябрь тылзыште шотлат. Тиде жап марте элыште эпидемиологий ситуаций саемшаш. Ушештарена, калык чот - перепись апрель тылзыште эртышаш ыле. Тудым 2020 ий гыч кусареныт. Шуко эл переписьым вес пагытлан кусарен. Маристат увертара: мемнан элыштат правительство тудым сентябрь тылзышке кусараш кӱштымаш дене лектын. Тиде жап марте коронавирус чер чакнышаш, тидланже вакцинаций полшышаш. Тений Российысе перепись икымше гана цифровой формат дене эрта. Ончысо дечын тудо ойыртемалташ тӱҥалеш. Калык чотым шотлымашке еҥ-влак «Госусгули» портал, шуко функциян рӱдер гыч ушнен кертыт, тыгак стационарный участке-влакым келыштарат. Ончысо семынак переписчик-влак мӧҥгат толаш тӱҥалыт. 

Шошым Йошкар-Оласе урем-влакым тӧрлаш тӱҥалыт. Мэрийыште увертарат: Подольский курсант-влак, Медицинский урем-влакым «Город» муниципал предприятий тӧрлаш тӱҥалеш. Подрядчикым ойырымо конкурсышко кок йодмаш пурен. Оршанский шоссе, Шернур да Санчурск кугорно тӱҥалтышым, тыгак Серов уремым «Марий Эл Дорстрой» акционер ушем ышташ тӱҥалеш. Нине уремым тӧрлаш оксам республикысе бюджет гыч регион вуйлатыше Александр Евстифеевын кӱштымашыже почеш ойырат. Пашам 1 майыште тӱҥалшаш улыт. 

Вес ийын Озаҥ олаште Специальный олимпиадын тӱнямбалсе телымсе модмашыже эрта. Марий Эл волонтер-влакым ямдылымаште полшаш ямде. Кодшо кечылаште тиде темылан пӧлеклалтше совещанийым видеоконференций йӧн дене Россий правительстве председательын алмаштышыже Дмитрий Чернышенко эртарен. Вашлиймаште палемденыт: Марий Элын кугу спорт таҥасымашлан волонтер-влакым ямдылаш  опытшо уло. Ресурс рӱдерын волонтержо-влак 2019 ийыште инвалид-влакын российысе 3-шо кеҥежымсе спартакиадыштым, Озаҥ олаште вӱд спорт дене тӱнямбал чемпионатым, 27-ше Универсиадым эртарымаште полшеныт. Олимпиаде вашеш  волонтер-влак Йошкар-Олаште экскурсийым эртараш кумылан улыт. 2022 ийыште Озаҥ олаште эртышаш Специальный олимпиадын тӱнямбалсе телымсе модмашке 108 эл гыч 2 тӱжем утла спортсмен ушнышаш. Нунын дене пырля тушто ешышт, почетан уна-влак лийыт, 3 тӱжем утла волонтер-влак полышкалаш тӱҥалыт. 

Республикыште шанче да технологий идалыкым почыныт. Марий Элыште тиде кечын республикыште йӱлашке шанче фестиваль тӱҥалын. Тений тудо 11 гана эртаралтеш. Фестивальым почмашке республике правительстве, министерство да ведомство-влакын еҥышт, регионын промышленный предприятий вуйлатыше-влак ушненыт. Шанче фестивальышке ушнышо-влаклан регион вуйлатыше Александр Евстифеев саламмутым колтен. Шанче да технологий идалык эл мучко эртаралтеш. Тидын шотышто Указышке кидпалыжым Россий Президент Владимир Путин эше кодшо идалык мучаште пыштен.  

 Тений регионысо кок у проектым пеҥгыдемденыт. Тиде «Самозянятый-влаклан сай условийым ыштымаш», тыгак «Россий Федераций граждан-влакын патриотический воспитанийышт». Марий Эл вуйлатыше Александр Евстифеев регинысо проект-влакым илышышке пуртымо, тидын дене пырля тений капитально чоҥымо объект-влак шотышто совещанийым эртарен. Кодшо ий мучаште исполнительный кучем 44 проектым шыҥдарыме шотышто федерал рӱдер дене ойпидышым ыштен. 2021 ийыште 25 регионысо проект-влаклан тӱрлӧ источник гыч 10 миллиард наре теҥгем ойырат. 

Фестиваль познакомит слушателей радиостанции не только с исполнителями, но и с авторами песен. К тому же зрители могут сами выбрать лучшую песню 2020 года. 

Шканет мо порым шонет, таҥланат, таҥ огылланат тугак ыште. «Ваш-ваш полшен, кумыл дене илаш»,– тыге кугызына-влакын сугыньышт ойла. Марий пайрем, йӱла нерген кумданрак палдараш. «МЭТР» телеканал онаеҥ-влак дене пырля «Марий йӱла» программым тӱҥалеш. Передаче эфирышке кажне кугарнян лектеш. Республикысе онаеҥ-влак йӱла ойыртем, ушемын паша радамже, пайрем-влак нерген каласкалаш тӱҥалыт. Программын унаже-влак коклаште республикын тӱрлӧ кундемлаж гыч онаеҥ-влак лийыт. 

Идалык жапыште Сергей Чавайн лӱмеш книгагудышто лудшо-влаклан пел миллион наре документым пуэныт. Республикын  тӱҥ библиотекыже шанче-практик конференцийым эртарен. 2020 ийыште тушто 24 тӱжем утла лудшо шотлалтын. Чылаже 239 тӱжем гана еҥ-влак книгагудышко толын коштыныт, тышечын 150 тӱжем утла онлайн йӧн дене библиотекын фондшо дене пайдаланеныт. Тачысе кечын  республикын книгагудыштыжо 1 миллион утла документ, савыктыш аралалтыт, тышечын 32 тӱжем утла марий йылме дене. Кажне ийын книгагудышко 8 тӱжем утла экземпляр у книга пура. Тыгак книгагудо электрон фондым пойдара. 

Марий тӱвыран фестивальже лиеш. Тудым Киров кундемысе калык усталык пӧрт заочно эртара. Тушко усталык коллектив, тыгак шкетын калык мурым йоҥгалтарыше, куштышо-влак ушнен кертыт. Конкурс икмыняр номинаций дене лиеш. Тиде калык куштымаш, муро, фольклор дене ойыртемалтше программе. Конкурсын положенийже дене Киров кундемысе усталык пӧртын сайтыштыже палыме лийын кертыда. Йодмаш-влакым 24 февраль марте вучат, а конкурс 25 февраль гыч 3 март йотке эртаралтеш. Тудын жапыште усталык коллектив да участник-влаклан йыргешке ӱстел эрта. 

Кок ий ончыч законодательствышке вашталтыш пурен. Тудын дене келшышын, контейнер площадке-влакым вераҥдыме шотышто вашталтыш лийын.  Шӱкым погымо вер пӧрт дечын 20 метр тораште лийшаш, тыгодым 100 метр дечын умбалнат тудым вераҥдаш огеш лий. Тиде верыште асфальт, але бетоным шарышаш улыт, тудын йыр пече лийшаш, тыгак пушеҥге але вондер-влакым шындаш кӱлеш. Пытартыш кок ийыште «Йошкар-Ола» оласе округын виктемже пеҥгыде коммунал шӱкым погымо 50 верым шотышко конден. Олаште илыше-влакын йодмашышт да темлымашышт дене пытартыш жапыште 20 утла контейнер площадке-влакын верыштым саемденыт, эше 10 площадкым у правил дене келшытареныт. Йошкар-Олаште пытартыш жапыште пӧрт-влак шукемыт, контейнер площадке-влакым ыштыме годым тидыже нелылыкым луктеш. Тыгай годым лӱмын чумырымо комиссий йодышым рашемда. Тушко Роспотребнадзор, экологий комитет, тыгак регионысо операторын еҥышт пурат. Тиде комиссий кӱлмӧ семын, контейнер площадкын кушто верланымыжым рашемда. Верысе кучем шӱкым погышо контейнер площадке-влакым ик реестрышке пуртен.