Морко район Изи Кушна ялыштат Сеҥымаш кечым лишемдаш полшышо-влакым шарналтеныт. Тӱвыра пашаеҥ-влак йоча-шамыч дене пырля тӱрлö акцийыш ушненыт. Кажне Геройым жаплен, поро мутым ойленыт.
Самырык, но поян историйым аралыше да ончыкылыклан кугу ӱшаным сулышо спорт туризмын видше. Мутем йӱдвел коштмаш нерген. Марий Элыште тиде толкын 10 ий ончыч вияҥаш тӱҥалын. 2014 ий 29 ноябрьыште рӱдоласе тазалык аллейыште йӱдвел коштмаш дене икымше занятий лийын. 10 ияш историй нерген кумданрак Эльвира Петрован материалыштыже.
Сеҥымаш кечылан пӧлеклалтше парад республикын кажне райрӱдыштыжӧ эртен. Пайремыште йӱла почеш митинг, марш, медальым кучыктымаш, монумент деке пеледышым пыштымаш лийыныт. Советский районысо парад гыч Вера Горохован сюжетше.
Сеҥымаш кечылан пӧлеклалтше мероприятий-влак ял шотан илемлаштат эртеныт. 9-ше майыште Шернур район Купран школын тунемшыже-влак Чылдемыр ялысе шарныктыш воктене кугезе коча-коваштым шарналташ чумыргеныт. Тиде школышто 52 йоча гына тунемеш, но кажныжын шке Талешкыже, шке геройжо, шке историйже. Кугу Сеҥымашын 79-ше идалыкшылан пӧлеклалтше митингыште ялын эртыкше, тиде кундем гыч тушман ваштареш кучедалаш кайыше еҥ-влак дене Чылдемыр ял шотан илемыште Ветеран-влак ушемым вуйлатыше Галина Кужнурова палдарен.
Эрик Сапаев лӱмеш опер да балет театрыште Кугу йоча хорын черетан выступленийже лийын. Йоча-влак сар жапысе совет элыште возымо композитор-влакын мурыштым йоҥгалтареныт. Тушто мемнан съемочный группына лийын.
Полонез, падеграс, сударушка, вальс да сар жапысе куштымаш-влак. Советский посёлкысо йоча усталык пӧртыштӧ Георгиевский бал эртен. Сеҥымаш кечын ты поро йӱла уста педагог Ирина Остапенкон тӱналтышыж дене ынде ятыр ий шукталтеш. Тений Георгиевский балыште Советский поселкын 2-шо да 3-шо номеран, Ӱшнӱр школын тунемшыже-влак, посёлкысо Йоча сымыктыш школ да Йоча усталык пӧртын воспитанникше-влак участвоватленыт. Чылаже 100 утла ӱдыр-рвезе куштымо мастарлыкшым ончыктен. Тунемше-влак ондак кажне шке команде ден выступатленыт гын, вара чылан ик тӱшка куштымаш дене балым мучашленыт. Ончышо-влаклан 10 номерым ончыктеныт.
Шочмо йылмын ямже | 42-шо выпуск.
Кугу сеҥымашын историйже - мыланна чот шерге. Тиде кече вашеш да тудын деч варат кундемыштына тÿрлö мероприятий-влак эртат. 61-ше номеран «Теремок» йочасадыште Сенымаш пайремлан поснак ямдылалтыныт. Икшыве-влакым патриотизм шÿлышеш куштымаш – тиде йочасадыште тÿҥ верым налеш. Кумданрак Кристина Быкован материалыштыже.
Марий йылмым модыш гоч туныктат да марий калыкын историйже дене палдарат. Тыгай йӧным марий йылме лагерь ышта. Тудым чумыраш Лариса Арламова темлен. Тыге 2022 ий историеш возалтын. Тений йылме лагерь 3-шо гана омсажым почеш. 13 гыч 19 июль марте Йошкар-Олаште марий йылмым тунемаш кумылан-влак погынат. Эртыше кок ийыште участник-влак Российын тӱрлӧ олалаже да йот элла гыч лийыныт. Каласыман, нуно чыланат шке шочмо йылмышт деч посна эше марий йылмым тунемыт.
Марий Элысе медиаагентствыште районысо газет-влакат лийыт. Республик кӱкшытан чыла газет-влак ик организацийыште тыршаш тӱҥалыт. У Медиахолдингыш кызытеш 8 газет пурен. Тиде республикысе периодикын пырля пашам ыштыме у йӧнжӧ.
