Республикын кечыжлан пӧлек – Марий парк. 3 гектар кумдыкан у каныме верым 1 ноябрьыште почаш палемденыт. Кугу эстраде сцене, куштымо вер, район-влакын посна увер стендышт, йоча площадке. Марий парк чыла шотыштат калыклан канаш йӧнештаралтын. Пайремле почмашлан таче могай паша шукталтеш - сюжетыштына каласкалена.
Йоча-влаклан кино кугу экраныште. Марий Элыште икымше гана «Йоча киноМай» поро кумылым ончыктышо киномарафон тӱҥалын. Тудо Республикысе Курчак театрыште почылтын. У проектын программышкыже киноиндустрийын пашаеҥышт дене усталык вашлиймаш, мастарлык-класс да музыкальный кас-влак пурталтыныт. Кинофестивальын икымше кечынже фильмым «Октябрь» кинотеатрыште, Калыкле Сымыктыш гимназийыште, Йошкар-Оласе художественный училищыште да Люльпан йоча пӧртыштӧ ончыктеныт. Чылаже йоча-влаклан 16 кином чылт яра ончыктат. Кино-влак икшыве да еш ден ончаш келыштарыме улыт. «Честное пионерское» трилогий, «Звёзды мне укажут путь», «Сестрёнка» да моло отечественный кино самырык тукымын поро кумылжым, келшымашым аклыме, кугуракым пагалыме шижмашыжым вияҥдаш полшат.
Йошкар-Олаште верысе ветеран ушем президиумын заседенийыже эртен. Тушто Кугу Ачамланде сарыште сеҥымашын 80 ияш лӱмгечыжлан пӧлеклалтше кугу программым каҥашеныт, кӱлешан социал йодышым рашемденыт. Тыгак Йошкар-Олаште илалше-влаклан кылым кучымо рӱдерым ыштыме нерген кутыреныт. Вашлиймашыште Йошкар-Оласе депутат-влак погынын председательже Лев Покровский лийын. Погынымаштыште чапкӱ-влак воктелсе кумдыкым тӱзатыме, оласе шӱгарлам сайын кучымо нерген каҥашеныт. Шуко йодыш лийын. Южылан вашмут уло. Нуным вес погынымаште каласат.
«Еш да йӱла», «Еш да тӱвыра», «Еш да туныктымаш», «Еш да тазалык», «Еш, шанче да цифровизаций». Лачак нине 5 секцийыште марий калыкын ончыкылык илышыж дене кылдалтше йодышым каҥашаш тӱҥалыт. 12-шо марий погын тений «Еш идалык» кышкарыште пашам ышта. Тудо Йошкар-Олаште 31 октябрьыште тӱҥалеш.
Виктор Яковлев воинский порысшым мучаш марте шуктен да Спецоперацийыште геройла 4 март 2022 ийыште колен. Тудын нерген аваже Элла Аркадьевна да пелашыже Олеся каласкалат.
«Давай на равных говорить…» проект кышкарыште марий поэт-влакын почеламутышт кок йылме дене йоҥгат. Произведений-влакым «Шочмо» самодеятельный театрын актержо-влак лудыт. Шукерте огыл проектын черетан вашлиймашыже эртен. Кумданрак Кристина Быкован сюжетыштыже.
Ешын историйже, тӱвыраже, йӱлажлан пӧлеклаште ончер. Калык келшымаш пӧртыштӧ «Искусство быть семьёй» лӱман выставке почылтын. Ончерыште марий кундемын да Российын эше икмыняр регионжо гыч мастар-влакын пашаштым чумыреныт. Мутлан, Тверь кундемын сӱретчыже Юрий Кугачын «Бабушка Иринья» радынаже толшо-влакын чоныштым иканаште савыра. Экспозицийыште чумырымо паша-влак тӱрлӧ жапыште возымо улыт. Ончер толшо-влакым ача-ава нерген шарнымашыш, йоча годсо пагытыш пӧртылта. Чыла паша сӱретчын илышыжым почын пуа, но туге гынат, кажныже тыште шкенжым ужын кертеш. Ончерыште сӱрет-влак деч посна декоративно-пракладной сымыктыш арвер-влак ончыкталтыт.
Этнокультур сынан мероприятийын вӱдышыжӧ мом палышаш? Тӱшка калыклан тӱткышым кузе ойырен шуктыман? Тӱвыра-тӱшка мероприятийым калыклан кузе чын келыштараш? Нине да моло йодышым Республикысе калык усталык рӱдерыште «Вӱдышын школжо» семинарыште лончыленыт.
Советский район Михайловка селаште Кугу Ачамланде, Афган сарлаште, Чечнясе военный конфликт, СВО-што вуйым пыштыше-влакым шарнен да жаплен, «Воину-освободителю» обелиск воктене митинг-реквием лийын. Тиде кечынак Кугу Отечественный сар годым тулык ӱдырамашын пӱрымашыжым аклен да тауштен пушеҥге-влакым шынденыт.
Марий Эл гыч делегаций Санкт-Петербургыш кая. 25 октябрьыште Невский пятачокышто Шарнымаш да Чап Интернационал аллейыште Кугу Отечественный сар годым тушто эрык верч кучедалше марий салтак-влаклан стеллым вераҥдат. Мемориалым марий кундемыште илыше-влакын патырлыкыштым шарнен почыт. Ты пашам виктарымаште Ленинград кундемысе марий-влакын «Ший корно» автономийышт кугу пашам шуктен.
