Йошкар-Олаште 275 тӱжем квадрат метр илымверым чоҥышаш улыт. Тидын нерген Александр Евстифеевлан рӱдолан мэрже Евгений Маслов увертарен. Йошкар-Олаште у микрорайон-влакымат ыштат, тыгак улшышто у пӧртым чоҥат. Ойпидыш дене аварийный пӧрт олмышто шуко пачеран пӧртым чоҥышо, тоштыжым шкежак пужышаш. Таче кечын кок тыгай ойпидыш уло.
У тунемме ий вашеш тӱшка верлаште да транспортышто маскым чийымым посна чот тергат, тыгак тӱшка верлаште дезинфекцийым эртарат. Регион вуйлатыше А.Евстифеев коронавирус инфекцийым шижтарыме шотышто оперативный штабын черетан заседанийыштыже тидым шукташ темлен. Республикын транспорт министр ешарен, пытартыш жапыште еҥ-влак транспортышто аралтыш маске-влакым шагалрак чият.
Озанлыклаште уржа-сорла. Тидын нерген республикын вуйлатышыже А.Евстифеев ялозанлык да продовольствий министр Александр Гречихо дене вашлийын. Республикыште озанлык-влак 135 тӱжем гектарыште пырчан да отызан культурым поген налшаш улыт.
У тунемме ий вашеш корно инспектор-влак школ корнын лӱдыкшыдымылыкыштым тергат. Тидым республикыше илыше-влакат полшен кертыт. 10 гыч 14 август марте кажне кумылан школ корнышто вашлиялтше корно тӧрсырым але лӱдыкшым фото але видошко ыштен да Кугыжаныш автоинспекцийын электрон почтышкыжо колтен кертеш 12ugibdd@mvd.ru . ГИБДД тудым шотышко налын, радемдаш тырша.
Марий Элыште культур да сымыктыш шотышто тунемме кластерым ыштат. Тудо ты отрасльлан специалист-влакым ямдылаш тӱҥалеш. Тӱҥ шотышто нациоанльный президентский школ-интернат, национальный президентский сымыктыш школым Палантай лӱмеш тӱвыра да сымыктыш колледж деке ушымо дене реорганизацийым ыштат. Тидын нерген тӱвыра, печать да калык-влакын пашашт шотышто министр К.Иванов Козьмодемьянск олаште эртыше правительстве заседанийыште увертарен.
Курыкмарий районышто шӱкым сортироватлыше комплексым 2021 ий мучаш марте ыштен шуктышаш улыт. Кодшо кечылаште регион вуйлатыше А.Евстифеев Козьмодемьянск олаште тидын шотышто совещанийым эртарен. Шӱкым погымо да тудым перерабатыватлыме йодыш тӱткышым йодеш. Тидын нерген регион вуйлатыше совещанийыште ойлен.
Пытартыш суткаште республикыште эше 14 еҥын коронавирус пеҥгыдемдалтын. Пандемий тӱҥалме дечын вара черланыше-влакын чотшо 3900 эртен. Тиде жапыште 36 еҥ ӱмыр лугыч лийын. Тазалыкаралтыш министерстве увертара. Марий Элын инфекционный стационарлаште 303 еҥ эмлалтеш, 299 пациентын пневмоний, 4 еҥ шодын искусственный вентиляцийыште.
Марий Элыште корным ыштыше-влак федерал кӱкшытан 16 километр корным уэмденыт. Тиде пашам Медведево да Звенигово районышто ыштеныт. Йошкар-Ола – Зеленодольск кугорнышто Кожласола да Красногорский гоч эртыше 8 километр корным тӧрленыт.
Опер да балет театрын артистше-влак Килемар районышто «Акпатыр» оперым ончыктат. Август мучаште «Кеҥеж тургым» фестиваль лиеш. «Раздолье» турист комплексыште кава йымалне тиде спектальым шындат.
Марий автономийын 100 ийжылан пӧлеклалтше этнофутуристический пленэрышке Татарстан, Удмуртий, Нижегородский область да эше икмыняр регион гыч сӱретче-влак толыт. Марий Эл дечын вич мастар ушна.
