Республикын районлаштыже уста чолга самырык-влаклан район администрацийын грантшым кучыктат. Килемар районышто сеҥыше-влакым икмыняр номинаций дене саламленыт.
Республике правительствын заседанийже кодшо арняште Козьмодемьянскыште эртен. Совещанийын пашашкыже моноола-влак фондын вуйлатышыже Андрей Баранов ушнен. Заседанийыште олан вияҥмашыже нерген да республикыште ыштышаш паша шотышто ойленыт. Вес ийын Козьмодемьянскыште шуко пачеран у пӧртым ыштат.
Колумб лӱмеш йоча да самырык-влаклан книгагудо «Объективыште – кенеж!» конкурсым увертарен. Тӱвыра, печать да калык-влакын пашашт шотышто министерствын сайтше почеш, ты конкурсышто икмыняр номинацийым палемдыме.
«Йыван Кырла. Путевка в жизнь» спектакльым Москваште ончыктышаш улыт.
Шыжым Москваште самырык режиссер-влакын «Артмиграция» фестивальышт эрташ тӱҥалеш. Тушто 100 йодмаш гыч 8-ым ойыреныт. Тиде радамыш Шкетан лӱмеш марий кугыжаныш драме театрын «Йыван Кырла. Путевка в жизнь» спектакльже пурен. Постановкым 14 сентябрьыште А.С. Пушкин лӱмеш драме театрыште ончыкташ шонат. Сценарийын авторжо да режиссержо – Степан Пектеев.
«Эн сай муниципал практик» российысе конкурсын регионысо этапыштыже 5 муниципал образований сеҥен. Нуно «Калык-влак дене пеҥгыде кылым кучымаш, общественный самоуправленийын кумдыкшым калыкын полышымыж дене вияҥдымаш» номинаций дене ойыралтыныт. Тиде Козьмодемьянск оласе округ, Медведево районышто верланыше Краснооктябрьский поселко да Озакъял ял шотан илем, Курыкмарий районысо Кузнецово, Килемар районысо Визимьяр ял шотан илем-влак. Нуно шке чапыштым Федерал кӱкшытыштӧ аралаш тӱҥалыт.
Марий Элын 4 районыштыжо калыкын тазалыкшым вияҥдыме шотышто программым пуртымо. Тазалык аралтыш министерствын сайтшын палдарымыж почеш, тиде паша Килемар, Медведево, У Торъял да Шернур районлаште шукталташ тӱҥалеш.
Марий Элым вуйлатыше Александр Евстифеев чоҥалтме объектлашке миен коштын, выездной совещанийым эртарен. Тудын дене пырля чоҥымаш кумдыкым Марий Элын чоҥымаш, архитектур да илем ден ола озанлык шонышто министр Михаил Степанов да рӱдолан мэрже Евгений Маслов онченыт.
30 июль, эрлан, стопкоронавирус.рф сайтын увертарымыж почеш, Марий Элыште эше 18 еҥын коронавирус пенгыдемдалтын. Эпидемий тӱҥалме деч вара мемнан кундемыште коронавирус инфекций дене чылаже 3752 еҥ черланен,
Кундемыштына химий да обществознаний дене экзаменым иктешлыме. Марий Элыште нине предметла дене экзаменым 11 выпускник 100 баллан кучен, нунын кокла гыч 9 – химий ден да 2 – обществознаний дене.
Козьмодемьянск ола корным тӧрлашлан Марий Элын фондшо гыч оксам ойырымо. Тидын деч посна, Учебная да Гагарин урем-влак корнывожым шотыш кондат. Республикынан эн тошто олаштыже паша шолеш.
