11 августлан республикысе инфекционный стационарла гыч 48 пациентым эмлалтмеке, мӧҥгышт колтеныт. Тидын нерген Тазалык аралымаш министерстве палдара. Йошкар-Оласе больницын стационарыштыже 102 пациент пневмоний дене эмлалтеш, 60 еҥын коронавирус пеҥгыдемдалтын. Кушкыжмо эрлан стационарлаште 286 еҥ эмлалтеш, 282 еҥын пневмоний, 109 еҥын коронавирус инфекций пеҥгыдемдалтын, 87 пациентын состоянийже неле. 11 августлан республикыште 15 еҥын коронавирус инфекций пенгыдемдалтын. 

Инвалид йоча-влаклан у йочасад почылтеш. Регион вуйлатыше А.Евстифеев чоҥен шуктымо у йочасадыште лийын. Тудым Йошкар-Олаште Воин-Интернационалист-влак урем 32-А адрес дене ыштеныт. Тушто спортзал, музыкальный зал, медицин да тунемме кабинет, тыгак вич группылан вер уло. 

Морко районысо рӱдӧ эмлымверыште йоча поликлиникым тӧрленыт. «Здравоохранений» национальный проектын «Развитие детского здравоохранения» проект дене тиде пашалан 1 миллион утларак ойыралтын. Йоча отделенийым ачаленыт, тыгак у мебельым налыныт. Йоча-влаклан приемым вучаш йӧнанрак лийже, шонымаш дене, отделенийыште модыш, тӱрлӧ тӱсан изи диван-влак улыт. 

Кампеткыште наркотик. 5-ше номеран исправительный колонийын оперативный отделын пашаеҥже-влак тудым посылкыште шекланеныт. Эртыше шуматкечын Советский районышто илыше колонийышке йокмам конден. Специалист кагаз дечын посна улшо тамле сийым тӱткын онченыт. Тудын кӧргыштыжӧ полимерный пленко гыч индеш шарик лийын, тушто – канде тӱсан порошок. 

Шернур район Кукнур селаште Йӱштӧ Кугызан илемжым телылан ямдылат. Районысо рӱдӧ клуб системын методике пӧлкан полшымыжо дене икмыняр проектым возен, сеҥеныт. Ик   проект дене шун гыч тӱрлӧ сувенирым ышташ шонат, кокымшо проект - Йӱштӧ Кугызан илемже ончылно печым да капкам чоҥаш , кумшо проект –  Йуштӧ Кугыза-влакын фестивальже. Кызыт тӱвыра пашаеҥ-влак печым ыштат. 

4 август гыч республикын Кӱшыл-Верховный судшым Артем Грачев вуйлата. Тидын шотышто приказым Россий Президент Владимир Путин пеҥгыдемден. Артем Грачевлан 44 ий. 2005 ий гыч тудо Йошкар-Оласе судын судьяже лийын, 2013 ий гыч Марий Эл Кӱшыл судын председательын алмаштышыже. 

Тӱрлӧ шӱкым посна погаш. Марий Элыште тиде пашам этап дене шуктат. Шӱкым погышо регионысо оператор республикыште шӱкым посна погаш контейнер-влакым вераҥда. Таче кечын 168 тыгай контейнер уло. Кызыт тӱҥ шотышто пластикым моло шӱк дечын посна погат. 

У тунемме ий вашеш корно инспектор-влак школ корнын лӱдыкшыдымылыкыштым тергат. Тидлан республикыше илыше-влакат полшен кертыт. 10 гыч 14 август марте кажне кумылан школ корнышто вашлиялтше корно тӧрсыр але лӱдыкшын фото але видеом ыштен,  Кугыжаныш автоинспекцийын электрон почтышкыжо колтен кертеш:  12ugibdd@mvd.ru. ГИБДД тудым шотышко налын, рашемдаш тырша. 

«Сеҥымаш диктантым» Байкал, Керченский пролив, Эльбрусышто возышаш улыт. Тений Россий да йот эллаште 7500 площадкым ышташ шонат. Сеҥымашын 75-ше идалыкыштыже тиде акций эшеат кумдан эртышаш. Байкалыште гын, тудым национальный гвардий войскан тунемме отрядыштыже возышаш улыт. 

Козьмодемьянск олаште купеч А.Свешниковын пӧртшым реставрироватлат. Тушто оласе библиотеке верланен. Культур поянлыклан шотлалтше объектым республикын 100 ийже вашеш тӧрлат. Тидлан 10 млн утларак ойыралтеш.