Йошкар-Олан Мэрийже Олан кечыж дене эн сай саламлымаш конкурсым увертарен. Тудо 30 июль гыч 7 август марте ойлайн йӧн дене эрташ тӱҥалеш.   Конкурсыш кажне кумылан ушнен кертеш. 

Марий Элын виктерыштыже рӱдолаштына у автовокзалым чоҥымо нерген каҥашат. Тудын кумдыкшо 11 тӱжем кв. метр лиеш. Тушто 870 кв. метран администраций пӧртым, 9 перроным, 80 веран вучымо залым да билет налме верым чоҥаш палемдыме. Тыгак 35 автобусым шогалташ ситыше посна верым да легковой автомашинам кодашлан кумдыкым ойырымо. 

Марий элын вуйлатышыже Александр Евстифеев Владимир Путинын эртарыме Селекторный погынымашыштыже лийын. Вашлиймаш видео йӧн дене эртен. Тушто санитар-эпидемиологий да шыже ден кеҥеж пагытыште тазалык аралтыш шотышто мутланеныт. Кызыт республикыштына ситуаций эркын сай велкыла вашталтеш. 

Марий Элыште 200 утла еш ава капиталым налын. 

Россий Федерацийын пенсий фондшо Марий Элысе еш-влаклан пел ий жапыште 2 158 ава капитал сертификатым пуэн. Тудын акше 602 млн. теҥге. Кодшо ий дене таҥастарымаште, Марий Элыште тиде 57% шукырак. 

Йошкар-Олан арт-объектше-влак почеш экскурсий маршрутым ыштат.

Тиде пашам тӱҥалме деч ончыч турист увер рӱдерын пашаеҥже-влак «Олан тӱсшӧ» проектыште тыршыше-влак дене граффити-влакым онченыт, нунын историйышт да шкешотан тамгашт дене палыме лийыныт. 

2020 ийыште республикысе Тазалык аралтыш министерстве «Земский доктор» да «Земский фельдшер» программа дене 12 вашкелшыкым пеҥгыдемден. 7 врач ден 5 фельдшер ялыш пашам ышташ куснен. 

Медведевысе рӱӧо эмлымверыш 2 невролог, тыгак Аксарка ФАП-ыш фельдшер пашам ышташ толыныт. Оршанкысе эмлымверыште рентгенолог, участковый терапевт, участковый педиатр да акушер-гинеколог шке пашаштым тӱҥалыныт. Тиде районын, тыгак Советский, Волжский районласе ФАПлаште самырык фельдшер-влак тыршат. 

Медведево районысо «Звезда» да «Спартанец» хоккей команде-влаклан у экипировкым налыныт. 

Россий кӱкшытыштӧ эртыше А. В. Тарасов лӱмеш «Золотая шайба» таҥасымаште самырык хоккеист-влак ончыл верыш лектыныт. Пӧлек шотеш кучыктымо сертификат дене у экипировкым налыныт. 

Тиде ийын Курыкмарий да Куженер районлаште эксплуатацийыш чылаже 3 газпучым пурташ палемдыме. Марий Элым вуйлатыше Александр Евстифеев кундемын газификацийже шотышто погынымашым эртарен. Республикын йӧнозанлык, экономикым вияҥдымаш да сатулымаш шотышто министр Станислав Крылов   «2019-2023 ийлаште марий элыште газификаций да газ пучым пуртымаш» программын пашаже нерген каласкален. 

28 июль эрлан 19 еҥын коронавирус пеҥгыдемдалтын. Суткаште республикысе стационарла гыч 85 пациентым луктыныт. Тачысе кечылан Йошкар-Оласе эмлымверыште 151 пациент пневмоний деч эмлалтеш. Коронавирус инфекций дене – 114 еҥ кия. 

2019 ийыште эртарыме йӱклымаш деч вара, Йошкар-Олаште илыше-влакын темлымышт почеш общественный кумдыкым тӱзатыме паша умбакыже шуйна. «Жилье и городская среда» национал проектыш пурышо  «Формирование комфортной городской среды» лӱман федерал проект почеш республикын рӱдолаштыже Ю.М.Свирин лӱмеш скверым да йолешке-влаклан 10 вончыкым олмыкташ палемдыме. Рӱдолан МЭРИжын палдарымыж почеш, кызытсе жаплан ямдылалтме паша кая.