Сентябрьыште Марий Элыште 473 аза шочын. Нунын коклаште 246 эрге да 227 ӱдыр икшыве. Ача-ава-влак шке шочшыштлан лӱм-влакымат ойыртемалтшым пуат. Эрге-влак коклаште ойыртемалтше лӱм-шамыч тыгайрак улыт: Гордей, Демид, Елисей, Серафим, Сиван, Халид, Эмир, а ӱдыр-влаклан шуэн вашлиялтше Аврора, Аксиния, Виола, Виталина, Грета, Доминика, Оливия лӱмым пуэныт.
Кок рояль, 14 баян, скрипке, виолончель, домра, балалайке, гитар, пуалтарыме семӱзгар-влак, тыгак туныктымо литератур да оборудований: мольберт, пюпитр, видеопроектор, пӱкен ден ӱстел, хоровой станок-влак. Марий сымыктыш школлашке «Тӱвыра» нацпроект дене 60 семӱзгарым да 80 комплект оборудованийым колтеныт. Тиде пашалан 16 миллион теҥге окса ойыралтын.
Курыкмарий районысо шӱкым сортироватлыше комплекс ныл тылзе жапыште кок тӱжем тонн наре пеҥгыде комунал шӱкым перерабатыватлен. Ты объект Кадышево ял воктене июльышто пашам ышташ тӱҥалын. Комплексын куатше – 15 тӱжем тонн. Тудым «Экологий» нацпроект почеш чоҥеныт. Ешарыман, Марий Элыште шӱкым сортироватлыше эше кум заводым ышташ палемдыме. Нуным Йошкар-Олаште, Волжскышто да Шернурышто чоҥат. Тылеч посна Медведево районысо Кучки посёлко воктене полигоным реконструироватлаш шонат.
Куяр лесничествыште 12 тӱжем утла тыгыде пӱнчым шынденыт. Ты паша «Сохраним лес» Россий кӱкшытан акций кышкарыште ышталтын. Акцийыш 200 утла еҥ ушнен - тиде Куяр лесничествын пашаеҥже-влак, оласе лицейын тунемшышт да студент-влак.
Волжск оласе йочасадлаште самырык ача-ава-влаклан полыш клубым чумырат. Икшывым йочасад гыч тӱҥалын школыш кайыме жап марте чын корныш шогалташ, психологически умылаш да ӱшаным сулаш куштылгыжак огыл.
2022-шо ий тÿҥалтыш гыч тачысе кече марте Шереметев замкыш 36 тÿжем наре еҥ миен. Ӱмашсе дене таҥастарымаште – тиде 27% шукырак. Ушештарена, Шереметев замкыш Пушкин карт денат пайдаланен миен кошташ лиеш. Тудын дене тений 1400 наре еҥ пайдаланен шуктен.
Мобилизацийыш логалше амалкалче-влак шке пашаштым ӱшаныме еҥлан коден кертыт. Тыгак тыгай предпринматель-влак кредит каникулым налын кертыт. Тидын шотышто Российын Президентше Владимир Путин у кӱштыкыш шке кидпалыжым пыштен.
Мемнан кундемыште «Лӱдыкшыдымӧ да сай качестван автомашина корно» нацпроект дене пашам палемдыме жап дечын ончылгоч шуктат. Тидын нерген республикын транспорт да корно озанлык министрын пашажым шуктышо Александр Герасименко «Дорога-2022» тӱнямбал выставкыше палдарен.
Кундемнан вуйлатышыже Юрий Зайцев республикыштына базовый ямдылалтмаш кышкарыште оператив штабым чумырен. Тушко тӱрлӧ министерстве да ведомство-влакын еҥышт пуреныт.
Параньга район Илеть селаште шарныктыш обелискым олмыктеныт. Тыште 292 еҥын лӱмжым серыме – нуно чылан Кугу Ачамланде сарыште шке шочмо мландыштым араленыт. Монументым 40 ий ончычак ыштеныт, но жап эртыме семын тудо тоштемын да локтылалтын. Тений обелискым Верысе инициатив программе почеш шотыш конденыт.
