Шкетан лӱмеш марий кугыжаныш драме театр эн сай пьесылан конкурсым иктешлен. Конкурсыш чылаже 12 пьесе пурен. Жюрим Марий кугыжаныш университетын туныктышыжо, филологий науко кандидат Галина Бояринова вуйлатен, тыгак тушто шанчызе, йылмызе, сылнымут мастар-влак пашам ыштеныт.
Волжскышто добровольчество рӱдер почылтын. У учреждений техник рӱдер пелен верланен. Тушто пӧлем-влакым тӧрленыт, у мебельым налыныт, тыгак кызытсе жаплан келшыше технике дене пойдареныт. Тачысе кечын Волжск олаште ик эн чолга доброволец-влак улыт. «Счастливый билет» волонтер отряд 10 ий ончыч ышталтын, нуно тӱҥ шотышто тазалык дене эмганен вияҥше йоча-влак дене пашам ыштат.
Йошкар-Олаште суртдымо-печыдыме-влаклан ыраш пункт почылтын. Тушко миен ыраш шонышо тӱҥ шотышто чылт айык лийшаш. Тиде пунктышто чайым йӱктат, шокшо вургемым пуат, тыгодым малаш кодаш лиеш. Йошкар-Олаште «Дом ночного пребывания» тӧнежын адресше: Фестивальный урем, 75. Йошкар-олаште телефон: 46-55-44. Пункт 1 май марте пашам ышта. Суртдымо-печыдыме-влаклан документым ыштыме шотышто специалист-влак консультацийым пуат. Тыгак учрежденийышке эреалан илаш кодаш медосмотрым яра эрташ темлат.
Марий Эл Правительствыште тений бюджет кучылтмым каҥашеныт. Тидлан пӧлеклалтше совещанийым Александр Евстифеев эртарен. Тений бюджетын роскот ужашыже 46 миллиард теҥге, идалык жапыште республикысе кучем министерство да ведомство-влаклан ешартыш дотаций-влакым колтен.
Марий Эл вуйлатыше Звенигово олаште канализационный коллекторым тӧрлаш 11 миллион тенгем ойыраш кӱштен. Александр Евстифеев тидлан пӧлеклалтше оперативный совещанийым эртарен. Звениговышто йӱштӧ вӱд дечын посна 7 тӱжем утла еҥ кодын.
Декабрь тылзыште корно полиций утларак тӱткӧ режимыште пашам ышташ тӱҥалеш. Автоинспектор-влак йӱшӧ вуя руль ончыко шичше, тыгак йолешке-влак дене кылдалтше корно туткарым шижтарымым эскераш тӱҥалыт. Пытартыш жапыште корно эҥгек-влак шукемыныт.
Ветеринарий комитет ир янлыклан бешенство деч иммунизацийым ышташ тӱҥалме нерген увертара. Тиде черым шаркалыме деч чодыра кумдыкышто специалист-влак вакциным оптат. Тудо тӱҥ шотышто шылым кочшо ир янлыклан келыштаралтын. Вакциным оптымеке, 21 кече гыч янлыкын иммунитетше пеҥгыдемеш да ик ийлан сита. Тиде жапыште трукышто айдемым пурлеш гын, айдемылан лӱдыкшым ок кондо.
Йошкар-Олаште ийготыш шудымо 25 йоча «комендант шагатым» пудыртен. Кодшо каныш кечылаште полиций пашаеҥ-влак черетан рейдым эртареныт. Тергымашым эртымеке 17 йочам дежурный частьыш колтымо, иктым – калык-влаклан полышым пуышо рӱдерышке. Республикыште 22.00 шагат кас гыч 6.00 шагат эр марте 18 ияш деч изирак ийготан-влак уремыште, тӱшкан погынымо верлаште ача-ава деч посна лийшаш огытыл. Кӱштымашым пудыртышо йочан ача-аважлан штрафым пуэн кертыт.
«Педагогический дебют–2021» республике кӱкшытан конкурсышто туныктыш аланышке ушнышо самырык специалист-влак таҥасат. Нунын стажышт вич ий деч шуко лийшаш огыл. «Самырык туныктышо» виктышыште Пушкин лӱмеш 4-ше гимназий гыч Екатерина Матвеева сеҥен. Козьмодемьянск ола гыч «Золотая рыбка» 2-шо йоча сад гыч Альбина Киселева самырык воспитатель-влак коклаште ойыртемалтын. А теве эн сай педагог-наставниклан Алексеевский кыдалаш школ вуйлатышын алмаштышыже Григорий Глушковым шотленыт.
Марий Элыште ыштыме «ушан» цифровой сервис-влакым Москвасе эмлымверлаштат илышышке пурташ тӱҥалыт. Шукерте огыл Йошкар-Олаште «поликлинике-влаклан ушан расписаний» проектым ыштыше Сергей Якунин Москвасе «Коммунарке» семын палыме - 40-ше номеран клинический больницын медсоветше дене вашлийын.
