Йочасадлаште ешартыш верым ышташ да районласе школ-влакын материально-технический базыштым уэмдаш 22 миллион теҥге ойыралтеш. Тидын шотышто документышке кидпалыжым регион вуйлатыше Александр Евстифеев пыштен.
Марий Элыште санитарный авиацийын «Ансат» вертолётшо вашкеполышым пуаш тӱҥалын. «Ансат» вертолётым медицине полышым пуашлан тичмашнек келыштарыме. Тыгай вертолет-влак дене кызыт ятыр вере пайдаланат. Неле пациентым вашке намиен да кӱчык жапыште полышым пуэн шукташлан моткоч сай йӧн. Вертолет Йошкар-Оласе аэропорт пелен шотлалтеш да йодмаш пурымо годым кеч-могай жапыште южыш нӧлталт кертеш.
Коронавирус инфекций ок чакне. Тудым жапыштыже ужын эмлымеке, ситуацийым мыняр гынат вашталташ лиеш. Тидлан вигак тестым ыштыман. Тачысе кечылан тестированийым кок семын эрташ лиеш, тиде ПЦР-тест да ИХА-тест. ПЦР тест лабораторийыште тергалтеш. Тыгай лабораторий республикыштына кумыт уло: Гигиена да эпидемиологий рӱдерыште, СПИД-центр ден икымше номеран Медсанчастьыште.
Чоҥымаш, илымвер-коммунал озанлык, олаште йӧнан кумдык-влакым шукемдыме среда нерген Москваште эртыше Россий Правительстве да Госсовет пелен семинар-совещанийыште каҥашеныт. Тудын пашашкыже Александр Евстифеев ушнен. Повесткыште - чоҥымаш да илымвер-коммунал озанлык-влакын вияҥме стратегийыштым каҥашымаш. Марий Элыште ты стратегийын тӱҥ шонымашыже-влакым республикын кугыжаныш программышкыже пуртымо. Тудо 2025 ий марте илышышке шыҥдаралтеш.
«Солнышко» интернат пӧртыштӧ пожар лӱдыкшыдымылык, санитар да социал полышым пуымо пашам саемдаш 6 миллион теҥге ойыралтеш. Тидын шотышто документышке кидпалыжым регион вуйлатыше Александр Евстифеев пыштен. Йоча пӧртыштӧ тошто окнам вашталтат, медицин блокым тӧрлат, электроснабжений системым шотышко кондат, тыгак медицин да кухньо оборудованийым уэмдат. Александр Евстифеев «Солнышко» интернат пӧртыштӧ ик гана веле огыл лийын, икшыве, педагог-влак дене вашлийын. Тений кеҥежым тӧнежыште лиймыже годым Александр Евстифеев учрежденийыште пожар системым вашталташ темлен. 
Марий Элыште национальный проект-влакын тений шукталтмыштым акленыт. Кундемыштына ик эн ончыч чыла пашам «Лӱдыкшыдымӧ да сай качестван автомашина корно» нацпроект почеш ыштыме. Тидлан республикылан 9 миллиард утла теҥге ойыралтын. Ноябрь мучаш марте Козьмодемьянскыште пассажир причалым чоҥаш конкурсым увертарат, тений тыгак республикысе ветеринарный лабораторийын проектше дене кугыжаныш экспертизе лийшаш, Звенигово олаште очистной сооруженийым чоҥаш 100 миллион теҥгем палемдат. Тений нацпроект дене ойырымо оксам республикыште кӱлеш семын кучылтмо. 
Рӱдӧ олаште автовоказалым жапыштыже чоҥен шуктымо. Тушто автобус да рейс-влакым вучаш йонгыдо зал, 10 перрон, ава да икшывын пӧлемже, медпункт уло. Вокзалым чоҥымаш – транспорт инфраструктурым вияҥдымаште у ошкыл, тидыже пассажир-влакым шупшыктымаш йодышым рашемдаш полшышаш. Шочмын 8.00 шагат эрдене регион вуйлатыше Александр Евстифеев пашам кузе шуктымым аклен. У автовокзал январь тылзе гыч пашам ышташ тӱҥалеш, кызыт объектым кадастр учетышко шогалтат, кӱлеш йодмашлан келшен толмо шотышто иктешлымашым ыштат, тыгак регион-влак кокласе остановко пунктласе реестрышке пуртат. 
Тазалык верч тарванылаш кӱлеш. Лач тыгаяк амал дене эше 500 еҥ скандинавий коштмашын техникыжым тунем лектын. Тиде проектыш «Йолгорно» скандинавий коштмаш дене республикысе рӱдер ушнен. Районлаште скандинавий коштмаш дене семинар-влак лийыныт.
«Марий Эл Радион» приложенийжым икмыняр арняште кок тӱжемат 500 утла еҥ шке телефонышкыжо вераҥден. «МЭТР ФМ» радиостанцийынат ынде шке приложенийже уло.
Саркуралым кучышо оза-влакым тергат. Идалык тӱналтыш гыч 5 тӱжем утла еҥ тергымашым эртен. Нунын кокла гыч законым пудыртен аралымылан 278 еҥым мут кучаш шогалтеныт. Саркуралым, патрон да пычалтарым аралымаште регистрацийым жапыште шуйымаш нергенат мондыман огыл. Мут толмашеш, тений гыч лицензийым 21 ияш деч кугурак ийготан-влаклан веле пуат. Адакшым, ты вашталтыш воинский службым эртыше-влаклан ок логал.
