Марий Элыште илыше-влак кокла гыч шукыжлан кагаз паша книжка келша. Республикыштына 197 тӱжем 416 еҥ пашам пуышо-влаклан могай паша книжка дене ыштымышт шотышто заявленийым пуэныт. 

Октябрь тылзыште кугу ачамланде сарын 70 ветеранже Российын президентше деч саламлымашым налеш. Кажне тылзын, шке юбилейыштым палемдыше, 90 ияш деч кугурак ийготан ветеран-влаклан кугыжаныш вуйлатышын саламлымашыжым кучыктат. Шыжа тылзын республикыыште илыше 90, 95, 100 ийым темыше 70 еҥ налшаш. Саламлымаш открыткым 58 удырамаш ден 12 пӧръеҥлан пуат. 

Марий Элыште у коронавирус инфекций дене черланыше пациент-влаклан медицине полышым пуышо кандаш организацийышке кече еда 70 утла еҥым эмлалташ пыштат. Врач-шамыч чыла гаяк пациентлан «пневмоний» диагнозым шындат. Тиде чер COVID-19 инфекцийын организмлан нелылыкым ыштымыж дене кылдалтын, а коронавирус – калыкын эпидемий ваштареш виктаралтше мере-влакым шуктыдымыж дене.

Самырык рвезе-влак «Авангард» военно-патриот рӱдерыште сборым эртат. Марий Элыште ик лагерь негызеш воспитаний да тунемме комплексым ыштат. Тушто самырык еҥ-влак ончыклык армий илышлан ямдылалташ тӱҥалыт. 

Йочасадлаште ешартыш верым ыштат. Тений идалык мучаш марте 1000 утла ясльыште верым ыштат. Вес ийын 575 верым ыштат. 2021 ийыште Медведево районышто Нурма селаште 55 верлан йочасадым ышташ тӱҥалыт.Тений идалык мучаш марте Йошкар-Олаште Молодежный микрорайонышто да Прохоров уремыште 320 верлан йочасад-влакым ыштен шуктат. 

Евгений Ярановын персональный выставкыже почылтын. Художникын 70 ияш лӱмгечыжлан пӧлеклалтше ончерым республикысе сӱретсымыктыш тоштерыште аклаш лиеш. «Усталыкын пиалже» лӱман экспозицийышке Российын сулло сӱретчыже тӱрлӧ ийлаште ыштыме, тоштер-влакын фондышт гыч ыштыме пашажым чумырен. Евгений Яранов Россий художник ушемын еҥже, 2005 ий гыч регионысо пӧлкам вуйлата.

«Йошкар-Ола театральная» фестиваль мучашлалтын. Театр пашаеҥ-влаклан «Йыван Кырла» лÿмеш премийым кучыктеныт. Куд кече республикын рӱдолаштыже кугу пайрем шӱлыш озаланен. Ты жапыште республикысе театр-влак 10 спектакльым аклаш луктыныт. Фестивальын Гран-При дене Сапаев лӱмеш опер да балет театрын «Аида» оперыже палемдалтын. «Эн сай режиссура»  - М.Шкетан лӱмеш театрын режиссержо Роман Алексеев «Илена-йӱлена» спектакльым шындымылан, «Эн сай сценографий» - "Йыван Кырла. Путевка в жизнь" спектакльын сценографше Екатерина Андреева, «Эн сай пӧръеҥ роль» номинацийыште Шкетан театрын актержо Артем Асмаевым саламленыт.

Шуматкечын 11 октябрьыште Йошкар-Олаште Чарла Кремльыште ялозанлык ярминга лиеш. Тушто шӧр-торыкым, шылым, пакчасакам налаш лиеш. Тидын дене пырля кушкыл да вондер-влакымат ужалаш кондаш сӧрат. Йошкар-Олаште илыше-влак ярмингаште сувенир сатум налын кертыт. Ялозанлык министертсвын увертарымыже дене, ярминга 9 гыч 15 шагат марте пашам ышташ тӱҥалеш. 

Республикыште 134 тӱжем гектар кумдыкышто пырчым поген налыныт. Тидыже план дечын 100 процент. 346 тӱжем тонным шийыныт. Уржа лектыш ик гектар гыч 26 центнер. Кодшо ий дене таҥастараш гын, тений озанлык-влак курал-удымӧ кумдыкыштым 9 процентлан шукемденыт. Пареҥгым гын, тений 1 тӱжемат 800 гектарыште шынденыт, 43 тӱжем тонным кӱнчен луктыныт, лектыш ик гектар гыч 242 центнер. Кызыт озанлык пашаеҥ-влак кокияшым ӱдат, тыгак мландым парлан куралыт. Кокияшым план дечын 94 процент кумдыкышто ӱденыт. Йытыным 680 гектарыште почкеныт, тиде план дечын 75 процент. 

Лишыл жапыште Марий Турек районысо Мосолов лӱмеш тоштер марий-влак кокла гыч Совет Союзын икымше геройжо Сергей Суворов нерген фильмым ыштен шукта. Шке жапыштыже видеограф Иван Иванович Герасимов тоштерышке тыгай шонымаш дене толын, тоштер пашаеҥ-влак проектым возеныт. «Марий кундемын патыр эргыже» фильмым ышташ шонымашым Тӱвыра, печать да калык-влакын пашашт шотышто министерстве сайлан шотлен. «Марий Элын кугыжаныш национальный политике» кугыжаныш программе дене тудым тений Сергей Суворовын шочмо велне Кугу Вочарма ялыште, тыгак Калуга областьыште сниматленыт