Марий  кугыжаныш университетыште симуляционный рӱдер почылтын. Тудым медицине факультет пелен ыштеныт. Тушто «Лечебное дело», «Педиатрий» да «Фармаций» аланыште тунемше-влак шкем шуарен кертыт. Рӱдерым почмаште Марий Элым вуйлатыше Александр Евстифеев лийын. Тудо вашкеполышым пуымо пӧлемлам, электрон медицин образований лабораторийым ончен лектын. Медицин факультетын деканже Виктор Никитинын ойжо почеш, ты рӱдерыште медпашаеҥ-влакын аккредитацийышт шотышто кугыжаныш экзаменым эртараш, студент-медик, врач да медшӱжар-влакым туныкташ сай йӧн уло. Кӧ шке ожсо профессийже деке пӧртылнеже гын, рӱдерын омсаже эреак почмо. 

Марий Эл Вуйлатыше Александр Евстифеев пашаче вашлиймаш дене кум районышто лийын. Эн ончыч Морко район Кужер поселкысо психоневрологий интернатым ончен лектын. Тушто 100 еҥлан келыштарыме илыме корпусым чоҥымо паша умбакыже шуйна. Пашам «Демографий» нацпроектыш пурышо «Кугырак тукым» федерал проект почеш шуктат. Чыла пашам идалык мучаш марте пытарышаш улыт. 

Республикыште посна ямде улмо режимым 15 ноябрь марте шуйымо. Тидым Александр евстифеев шке указыштыже пеҥгыдемден. Граждан-влаклан кӱлеш деч посна илыме вер гыч лекташ, лӱдыкшыдмылыкым эскераш темлат. Поснак 65 ияш деч кугурак ийготан-влаклан тӱткырак лийман. Пашам пушо-влаклан очно ыштыше-влакым шагалемдаш темлат. Тыгак командировкышкат лектын кошташ огеш лий. Лудыкшыдымылык апрвилым эскераш ида мондо.

Ӱдыр-влакын мастарлыкыштым ончыктышо, уш-акылштым тергыше Кажне ийын эртаралтше регион кокласе «Ӱдырсий» конкурсым тений онлайн-форматыште эртарат. Участник-влаклан икмыняр материалым ямдылаш кӱлеш, тиде «Мый марий ӱдыр улам» видеовизитке. Кужытшо 2 минуташ лийшаш. Тыгак ӱдыр-влак шке кундемыштышт эртаралтше марий йӱлам видеош войзышаш улыт, условий почеш тудым 7 минут марте кужытаным ышташ йӧн уло. Кумшо – тиде этномодо. 

Марий Элысе кучем-влак республикыште илыше кажне кумылан еҥ дене социал кылыште мутланаш ямде улыт. Мутлан, Волжск олан администрацийже сайтышкышт возышо пӧръенлан вашмутым пуэн. Тудо пушенгым руымо деч вара укшым шала кышкен кодымылан вуйым шийын. Тыге верысе кучем ты верым эрыктен.

Российысе просвещений министерстве партнер-влак дене пырля элнан чыла гаяк регионыштыжо кугу проектым илышыш шыҥдара.Российысе просвещений министерстве партнер-влак дене пырля элнан чыла гаяк регионыштыжо кугу проектым илышыш шыҥдара. Тушко коронавирус пандемийлан кра эҥгекыш логалше еҥ-влаклан профессионал шинчымашым пуышо программым эрташ темлат. Курсым школ, техникум да ВУЗ-влакын выпускникышт, пандемий годым паша деч посна кодшо да сокращенийыш логалын кертше еҥ-влак эртен кертыт. Ик тылзе жапыште участник-влак тунеммашым эртат да нунылан у специальностьым налме нерген документым кучыктат.

Марий Элын 100 ияш лӱмгечыже вашеш Колумб лӱмеш республикысе йоча да самырык-влаклан книгагудо сылнымут конкурсым увертарен. «Мый йӧратем родной элемым» лудшо-влак кокласе таҥасымаш 5-гана эрта. Тушто кок номинацийым палемдыме-марий да руш йылме дене лудмаш. Регион кокласе сылнымут конкурсыш студент, тунемше-влак ушнен кертыт.   Ийгот дене икмыняр категорийым палемдыме: 1 ше гыч 4 класс марте, 5-8 класс марте, кугурак класслаште тунемше да студент-влак.

Марий Элын ковид-стационарлаштыже 700 утла пациент эмлалтеш.  Инфекций отделенийлаште тачысе кечын 741 еҥ кия, 222-шын коронавирус. Эше 40 еҥым стационарыш пыштеныт. Ковид дене черланыше-влакын чотышт шукемынак шога. Тачысе кечылан 36 еҥын тиде вирус пеҥгыдемдалтын. Пандемий жаплан чылаже 5207 еҥ черланен. Шкендам аралыза.

Марий Элыште экологий диктантлан ямдылалтыт. Россий кӱкшытышто тудо 15-16 ноябрьыште эртаралтшаш. Шке шинчымашым оффлайн але онлайн йон дене порталыште тергаш лиеш. Тудо шыжа тылзын икымше пелыштыже пашам ышта. Экологий диктантыште  кум творческий конкурс уло:

Икымше – «Эн сай экологий видеоурок», 

Кокымшо –«Экодиктантын эн сай слоганже» - тудо проектын «визитный карточкожо» лиеш.

Тыгак «Экодиктантын участникше-влаклан эн сай йодыш». Конкурс паша-влакым ecodiktant@ravnopravie.online. электрон почтыш колташ лиеш.

Ноябрь тылзыште, Олимпий резерв училищыште, «Кап-кыл культур да спортын пӱсӧ йодышыжо» регион кокласе 8-ше шанче-практик конференцийым эртараш палемдыме. Тудым видеоконференций йӧн дене, 20 ноябрьыште эртарышаш улыт.