Волжск олаште виртуал концерт залым ыштат. Тидлан кок  миллионат пеле теҥге ойыралтын. Тудо«Звездный» тӱвыра да каныме рӱдер негызеш лиеш. Учрежденийын модернизацийже «Культура » нацпроектын «Цифровая культура» федерал проект дене келшышын шукталтеш. Мемнан республикыште тиде кумшо тыгай проект. Ты марте концерт залым Козьмодемьянскыште, тыгак Эрик Сапаев лӱмеш опер да балет театрыште почыныт. Виртуал концерт залым ыштымеке, еҥ-влак Россий да Европо артист-влакын усталыкыштым аклен кертыт. 

Республикысе школлаште педагогический класс-влакым ыштат. Кундемнан ик эн кугу ВУЗ-шо туныктыш да шанче министерстве дене тидын шотышто ойпидышым пеҥгыдемден. Тений педагогический класс-влакым Йошкар-Олаште 1-ше да 7 –ше номеран школлаште, тыгак Оршанка поселкысо школышто почшаш улыт. Проектын тӱҥ шонымашыже – кадр йодышым рашемдаш, школ да йочасад-влаклан педагог-влакым мемнан кундемыштак туныктен лукташ. 

Курыкмарий районышто кундемын 100 ияш лӱмгечыже лӱмеш ӧрыктарыше шондыкым ыштеныт. Шондыкым 25 ий гыч, 2046 ий январьыште почшаш улыт, тунам Курыкмарий район шке 125 ияш лӱмгечыжым вашлиеш. Шондыкым мастар Александр Исаев ыштен.

2022 ийыште Марий Элыште фотовидеофиксацийым ышташ 10 комплексым вераҥдышаш улыт. Тиде пашам икымше кварталыштак шуктат. Тидын дене пырля федерал погылан шотлалтше 12 камерым Марийскавтодорын погышкыжо кусарат. Тачысе кечын регионысо да федерал кугорнылаште фотовидеофиксацийым ышташ 83 комплекс уло, нунын гыч 9-же вер гыч верышке кусарыме. Кодшо ийын 25 комплексым вераҥденыт. Нуным ГИБДД-н темлымашыже почеш корно туткар шуко лийме верлаште келыштарат. 

Коронавирусын у штаммже – «Омикрон» еҥ-влакын тазалыкыштлан эшеат кугу лӱдыкшым ыштен кертеш. Тидын нерген тазалыкаралтыш министр Марина Панькова журналист-влак дене вашлиймаште палдарен. Республикысе тазалыкаралтыш системе тидлан ямдылалтеш, койко-вер-влакым 20 процентлан шукемдат, эм препарат-влакым ситарат. 

Тений Марий Элыште 20 кӱварым тӧрлат. «Лӱдыкшыдымӧ да сай качестван автомашина корно» национал проект дене келшышын пашам регионысо кӱкшытан 17 объектыште, тыгак верысе кӱкшытан 15 объектыште шуктышаш улыт. Тений «опорный» манме сетьышке пурышо корно-влакым нормативлан келыштарыме шот дене кугорно-влакым тӧрлаш тӱҥалыт. Кум ий жапыште нацпроектым илышышке пуртымеке, 253 километрым ыштеныт. Тений пашам «Йошкар-Ола-Уржум», «Елеево-Марий Турек - Лоп», «Корта-Куяр» ужашыште шуктат. 

Кажне ийын Йошкар-Оласе туныктыш виктем «Сылнымут аршаш» конкурсым увертара. Тудо Марий тиште кечылан пӧлеклалтеш да 29-ше номеран марий йочасад пелен эрта.   Йоча-влакым конкурслан ямдылымаште воспитатель да ача-ава-влак моткоч тыршат. Конкурсыш 3 гыч 7 ияш марте кажне йочасад гыч ик участник ушнен кертеш. Тений ынде кокымшо гана поэзий таҥасымаш онлайн йӧн дене эртен.

Йошкар-Оласе йоча поликлиникым капитально олмыкташ палемдыме. Йоча эмлымверын 1-ше номеран поликлиникыштыже шукертак тидым вучат. Тазалыкаралтыш министерствын увертарымыж почеш, ремонт 15 миллион утла теҥгеш шуэш. Зданийыште окнам, омсам вашталтышаш улыт, кӧргӧ отделкым да моло пашам ышташ тӱналыт. Проект дене келшышын, ачалымаш паша 2022 ийыште шукталтшаш.

2022 ийыште нацпроект почеш Йошкар-Оласе шым уремыште корным шотыш кондат. Олмыктышаш корно кумдыкым палемдыме. Лебедев, Карл Либкнехт, Осипенко, Кремлевский, Анциферов, Чехов, Гагарин уремлаште  корным тӧрлаш тӱҥалыт. Тачысе кечылан подрядчик-влак дене контрактым пеҥгыдемдыме. Нуно тӱҥалтыш пашалан ямде улыт.

Марий Эл гыч вес эллашке утларакшым  чоҥымо продукцийым, тыгак целлюлоз-кагаз сатум колтат. Алекснадр Евстифеев «Сделано в России» тӱнямбал экспорт форумын пашашкыже ушнен. Тушто экономикым, экспортым вияҥдыме нерген каҥашеныт. Марий Элын 94 эл дене кылже уло. Экспорт шотышто тӱҥ партнер-влак: Египет, Казахстан, Германия, Беларусь, Узбекистан, Китай, Финляндия, Украина, Азербайджан да молат улыт.