Тунеммаште, проект, шанче, спорт аланыште ойыртемалтше студент-влаклан лӱман стипендий. Тыгайжым республикыште 59 еҥ налаш тӱҥалеш. Марий Эл вуйлатышын стипендиатше-влакым саламленыт. Юрий Зайцевын суаптарже-влакым Правительстве председательын икымше алмаштышыже Михаил Васютин кучыктен.
Кундемыштына илыше еҥ-влак шке йыр улшо вер-шӧрым тӱзатымашлан кугу тӱткышым ойырат. Шонымаш-шамычым илышыш шыҥдараш «Йӧнан оласе средам ыштымаш» программе полша. Тудын дене келшышын парк, сквер, бульвар да тӱшкан погынымо моло кумдык-влак уэмыт.
«Лӱдыкшыдымӧ ола» – преступлений ышталтмым палаш да тудым рашемдаш полша. Тудын нерген Правительствыште эртыше совещанийыште каҥашеныт. Республикым вуйлатыше Юрий Зайцев видеоэскерымаш системын кӱлешлыкшым сай могыр гыч палемден. Йошкар-Оласе уремлаште да моло вере вераҥдыме эскерыше видеокомплекс-влак правам пудыртышо икмыняр еҥым жапыштыже кучаш полшеныт.
Мобилизаций почеш порысым шукташ кайыше-влакын лишыл еҥышт социал кыл гоч ятыр йодышым тарватат. Йодмаш-влак республикынам вуйлатыше Юрий Зайцевланат пурат. Шукерте огыл тудо икмыняр еш дене шкежак вашлийын мутланен. «Лишыл еҥда верч азапланымым мый умылем. Мый нунын дене Ульяновскышто шке вашлийынам да мо дене полшаш кӱлмым рашемденам. Тиде йодыш мыйын ончыл верыште», - умылтарен погынышо-влаклан.
Марий Эл, чумыр Россий дене пырля Донецкий да Луганский Республике-влаклан, Запорожский да Херсонский областьлаште илыше да службым эртыше-влаклан полышым чумыра. Республикын кажне районыштыжо полыш кидым шуялташ ямде улыт. Калык фронт черетан гуманитар полышым колтен. Тидын радамыште кочкыш, вургем, канцеляр сату, вӱд, сарзыеҥ-влаклан кӱлешан арвер-влак.
Тунемше-влак уш-акылыштым олимпиадылаште тергат. Республикыште школ предмет-влак дене олимпиадын регионысо этапше тӱҥалын. Икшыве-влак 21 предмет дене шинчымаш келгытыштым ончыктат. Туныктыш да шанче министерствын палдарымыже дене, олимпиадын муниципал этапше 8 декабрьыште мучашлалтеш. Кӱлеш баллым погышо да ончыл верышке лекше-влак регионысо этапышке ушнат. Тудо республикыштына 10 январь гыч 21 февраль марте эрташ тӱҥалеш.
Марий Элыште йоча да самырык-влакын российысе толкын дене кылым ыштыше ушемым чумыреныт. Тидын шотышто Указышке кидпалыжым регион вуйлатыше Юрий Зайцев пыштен. Тудак у совещательный органым вуйлата. Совет российысе кугыжаныш организацийын регионысо пӧлкан пашажым вияҥдаш тӱҥалеш.
Марий Элыште Украинысе боевой действийын участникше-влаклан реабилитаций отделенийым почыт. Тиде амал дене Кугыжаныш Погынын Председательже Анатолий Смирнов ден сарын ветеранже-влакым эмлыше госпитальын тӱҥ врачше Алексей Красильников вашлийыныт да организаций йодыш-влакым каҥашеныт. Палемден кодыман, тений госпиталь поро кумылым ончыктышо «Память поколений» фондын эртарыме конкурсыштыжо 10 миллион теҥгем грант семын сеҥен. Тиде окса дене тазалыкым пеҥгыдемдаш тӱрлӧ оборудованийым налыныт. Вашлиймаште тыгак мобилизованный да нунын ешыштлан медицин полышым пуымо шотыштат мутланеныт.
«Авангард» рӱдерыште спецоперацийын участникше – доброволец-влак ямдылалтмашым эртен кертыт. Рӱдерыште сенатор Сергей Мартынов лийын. Тудо илыме йӧн, тунеммаш да программе-влак дене палыме лийын. Тиде кечылаште «Авангард» рӱдер доброволец-влакын икымше тӱшкаштым вашлийын. Ушештарена, Юрий Зайцев тиде рӱдерыште сарзе илышлан ямдылалтмашым эртараш темлен. Икымше толкынын курсантше-влак кокла ийготан пӧръеҥ-влак улыт. Нуно икымше полышым, сарзе службым тунемыт, но иктешлымашым военный комиссариат гына ышташ тӱҥалеш. «Авангард» рӱдерын кок ий пашам ыштыме жапыштыже тушто 10 тӱжем утла самырык еҥ слет, зарнице, тунемме сборышто лийын.
Регион вуйлатыше Юрий Зайцев у Элкӧргӧ паша министр Андрей Вырвич дене вашлийын. Россий МВД-н вуйлатышыже, полицийын генералже - Владимир Колокольцев у министр дене личный составым палдарен. Андрей Вырвич шке пашажым сайын палыше семын ончыктен.
