Ныл йоча сымыктыш школым тений у семӱзгар дене пойдарат. Тиде пашам Владимир Путинын тӱҥалтышыже дене илышышке пуртымо, «Тӱвыра» нацпроект дене келшышын шуктат. Звенигово, Куженер, У Торъял, Шернур районысо  тунемме верлалан рояль, пианино, скрипке, гитар, балалайке, тыгак мольберт, софит, принтер, тунемме пособийым налыт. 

Тыгак тений идалык мучаш марте Волжскышто «Родина» кинотеатрым йоча сымыктыш школлан тӧрлат. 2019 ий гыч нацпроект дене 8 тунемме верлан у семӱзгарым налыныт, тыгак 6 йоча сымыктыш школым тӧрленыт. 

Марий Эл вуйлатыше Юрий Зайцев спорт объектлаште лийын. Тиде «Арена» куштылго атлетике манеж. Марий Эл Республикын кечылажым Федераций Советыште эртарыме годым социал политике комитетын заседанийыштыже тиде объектыште пашам шуйымым сенатор-влак сайлан шотленыт. Тудын икымше этапшым 2015 ийыште ыштеныт. Кокымшо этапысе паша дене унагудым ыштышаш улыт, тыгак тушко врачебно-физкультрунй диспансер куснышаш. Тений тидын шотышто проектым ыштат.

Кодшо ийын Марий Элыште IT-компаний-влакын ыштен налме парышышт 6 миллиард теҥгешке шуын. Тачысе кечын Йошкар-Олаште 130 утла IT-компаний пашам ышта. Нунын гыч ик эн кугу компаний-влакым «Россия» выставке форумышто ончыктеныт.

Кодшо ийын Марий Элыште 3 тӱжемат 400 наре еҥым аварийныйлан шотлалтше пӧртла гыч кусареныт. Тидын нерген видеоселекторный совещанийыште ойленыт. Тудым Правительствын вице-премьерже Марат Хуснуллин эртарен. Тушко Юрий Зайцев ушнен.

Кодшо ийын Марий Элыште ныл спортзалым тӧрленыт. Тиде пашам «Образований» нацпроект дене келшышын ыштеныт. Звенигово районысо Мочалище, Оршанка районысо Тошто Крешын, Параньга районысо Элнет, Юрино районысо Козиково школышто. Тидын дене пырля Волжский район Эмеково школ пелен сооруженийым ыштеныт, тыгак кок тунемме верлан спорт инвентарьым налыныт.  

Тений «Земский доктор» программе дене Марий Элысе тора яллаште да поселкылаште 38 медицин пашаеҥ тыршаш тӱҥалеш. Ты радамыште 29 врач да 9 кокла медицин пашаеҥ. Кодшо ийын республике 35 специалист дене ойпидышым ыштен. 1 врач да 1 медшӱжар Семеновкысо врачебный амбулаторийышке,  Республикысе психиатрический больнице да Помар эмлымверышке 1 врач дене толыныт. Шернур да Оршанка рӱдӧ эмлымверлаште 4 врач ты программе дене пашам ышташ тӱҥалын, Звенигово рӱдӧ эмлымверышке 3 специалист толын. 

Троллейбусышто да автобусышто кайымылан ак кӱзен. Банк карте дене тÿлаш гын, билет ак шулдырак лектеш. 1 январь гыч троллейбуслан ак 3 теҥгелан кÿзен. Ынде транспортышто кудалыштмылан да багажлан 29 теҥгем тÿлыман. Банк карте дене тÿлаш гын, билет ак 26 теҥге. Кодшо ийын троллейбусышто кудалыштымлан ак 2 гана вашталтын, 1 март гыч 24 теҥге лийын, а 1 июль гыч ‒ 26 теҥге, тыгодым банк карте дене 23 теҥгем веле шоген.