Кодшо ийын Марий Эл икмыняр социал-экономике показатель дене кӱкшытым ончыктен. Промышленный производствын кушкын толмыжо дене Юл кундемысе федерал округышто кокымшо верыште улына, Российыште ‒ 10 верыште.
2024 ий октябрь тылзыште марий-влак 12-шо Марий погыныш чумыргат. Планым Республикысе Виктер пеҥгыдемден. 12-шо Марий погын 438 делегатым да 100 наре унам пырля погышаш. 1 тӱжемат 100 марий деч 1 делегат. 12-шо марий погынышто молгунамсе семынак 6 тӱрлӧ комиссий пашам ышташ тӱҥалеш. Погынлан ямдылалтме пашам оргкомитет эртыше ийынак тӱҥалын. Тачысе кечын Марий Мер Каҥаш погынлан ямдылалтме чыла йодыш кокла гыч ик эн тӱҥжым, а тиде делегатым сайлыме шотышто пашам виктара. 1 июнь гыч 31 август марте делегатым сайлаш тӱҥалыт. Каласыман, делегатым сайлыме нерген йодмашым ик тылзе ончыч пуыман. 12-шо Марий погынлан ямдылалтме паша кышкарыште Мер Каҥаш Киров марий-влак дек миен коштеш. 22 мартыште Киров олаште Мер Каҥаш Президиумын заседанийже лиеш.
Республикыште илыше 8 тӱжем утла еҥ ялозанлык сферыште тыршымылан пенсийыш ешартыш оксам налеш. Социал фондын регионысо отделенийыштыже умылтарат: 30 ий ялозанлыкыште тыршымеке, пенсийлан 25 процент ешартышым тӱлат. 2024 ий 1 январь гыч тиде, кокла шот дене, 2 тӱжем наре теҥге. Тиде выплате пенсийыш лекмеке, олашке илаш куснымекат, аралалтеш.
Сад да пакча товариществе марте газ толеш гын, «еҥ-влак канде тулым» шке участкышкат пуртен кертыт. Республикыште 1 июнь марте тидын шотышто инвентаризацийым ыштен шуктышаш улыт. Ушештарена, Россий Президент Владимир Путин Федеральный собранийлан посланийыштыже сад участке марте догазификаций программе дене газым пурташ кӱштымашым ыштен. Марий Элыште тидын шотышто паша кая, план-графикым ыштеныт, объектым радамлат. Тиде йодышым видеоселекторный совещанийыште каҥашеныт. Тудым Россий Правительстве Председательын алмаштышыже Александр Новак эртарен. Мутланымашке Юрий Зайцев ушнен. Мемнан республике элын 74 субъектше гыч догазификаций программе дене 2 верыште. Тачысе кечын 7 тӱжемат 800 йодмаш пурен, тышечын 6 тӱжем утла участкышке газым пуртеныт.
«Усадьба Шереметевых» тӱвыра объектлан шотлалтше зданийын проектшым ыштат. Марий Элын вуйлатышыже Юрий Зайцев реставрацийым тӱҥалаш документым ямдылыме шотышто совещанийым эртарен. Тудо ушештарен, ты темым Россий Президент Владимир Путинын дене вашлиймаште нӧлталыныт. Юрино поселкыш ятыр турист толеш, шукын Шемеретевын замокшым ончаш кумылан улыт. «Усадьба Шереметевых. Главный дом» объектым Федераций Советыште Марий Элын кечыже годымат онченыт.
Йошкар-Олан перинатал рӱдерже «Репродуктивный потенциал России» Россий кӱкшытан форумын экспертше-влакын иктешлымашыже дене Юл кундемысе федерал округышто пашам ик эн сайын ыштышылан шотлалтын. Марий Элын тазалыкаралтыш министерствыже ешара: тиде учреждений элысе 55 перинатал рӱдер коклаште ‒ 7 верыште. Тыгай кӱкшытыш рӱдерын материально-технический базыжым уэмдымаш пуэн. Кызыт тудо специализированный кӱкшӧ технологиян медицин полышым пуышо кумшо уровнян рӱдерлан шотлалтеш. Кодшо ийын республикыште шочшо икшыве гыч 82 процентшым авашт перинатал рӱдерыште ыштеныт. Марий Элыште аза-влакын колымашышт Российысе показатель деч 9 процентлан шагалрак.
Казаньышке мийыме годым Юрий Зайцев промышленность да ужалымаш министерствын иктешлыше коллегийын заседанийыштыже лийын. Тудын деч ончыч Татарстанын промышленный предприятий-влакын выставкыштым онченыт. Марий Эл пошкудо регион дене промышленность, ялозанлык, информаций технологий, туризм да тӱвыра могырым вашкылым кумдаҥден кертеш, промышленностьышто вашкылым ышташ потенциал кугу.
Волжскышто рӱдӧ площадь уэмын. Тиде пашам Российысе конкурсышто сеҥымеке, ышташ йӧн лектын. Марий Эл вуйлатыше Юрий Зайцевын кӱштымашыже дене Волжскышто паша шукталтмым Марий Эл Виктер вуйлатышын икымше алмаштышыже Михаил Васютин аклен.
Марий Эл вуйлатыше Юрий Зайцев Йошкар-Олалан 440 ий темме пайремлан пӧлеклалтше мероприятий-влакым ямдылыме йодыш дене совещанийым эртарен. Тидлан оргкомитетым ыштеныт. Тений 30 январь гыч 4 февраль марте ВДНХ-ште «Россия» тӱнямбал выставке-форумышто Марий Эл Республикын рӱдолажын – Йошкар-Олан – арняже эрташ тӱҥалеш. Пайремын кугу мероприятийже-влакым 6 гыч 11 августлан палемдыме.
Марий Эл да Татарстанын вуйлатышышт регион-влак кокласе вашкылым вияҥдыме шотышто каҥашеныт. Юрий Зайцев Рустам Минниханов дене вашлийын. Тачысе кечын марий кундем гыч организаций-влак Татарстанышке пырчан да отызан культурым, чыве шылым, шыл полуфабрикатым, консервым, ӱйым, сырым колтат. Татарстаныште Марий кундемысе кугу организаций-влакын кевытышт пашам ыштат. Машинам чоҥымо да металлообработко шотышто промышленный предприятий-влак Татарстанын предприятийже-влак дене партнер улыт. Тыгак пошкудо регионышко ужалымаште кучылташ холодильный оборудованийым, кӱртньӧ омсам, фурнитурым да электроустановочный изделийым колтат.
